من فيلم غريب.. في بيتي
عفاف لخبيرة إعلان مُعجبة بشحاتة: يا حلاوة! ده إنتي عينك يندب فيها رصاصة!

من فيلم السفيرة عزيزة
أحمد: أنا كمان لو رجعت في يوم م الأيام ومالقيتش الأكل جاهز..
عزيزة: يا مصيبتي! وده معقول؟!
أحمد: تعرفي حاعمل إيه؟ حامسكك من إيدك، وأسحبك في المطبخ، وأقفل الباب بالمفتاح، وأمسك السكينة، وأقرَّب عليكي وأقولِّك: "هاتي البطاطس يا عزيزة".

من فيلم غريب.. في بيتي
كوثر: هو إنتي دايمًا تتسكِّي كده؟!
عفاف: أعمل إيه بقى في حظي الهباب ده؟
كوثر: هو أنتي عندك حظ خالص؟! ياختي انزلي هاتيلك حظ من شارع الشواربي!

من فيلم الزوجة الثانية
عتمان: إيه ده؟!
فاطمة: عشان عروسة.
عتمان: كل ده؟! بط ووز وفراخ وحمام؟!
فاطمة: إيه يا عمدة؟ خسارة فيَّ؟!
عتمان: لأ. خسارة ليَّ!

من فيلم الكرنك
طالب 1: كل ده قماش؟ كل دي يُفَط؟
زينب: والكلام ده مين اللي حايقراه بس في "ميت معقول"؟
إسماعيل: الفلاحين طبعًا.
زينب: مش لما نعلمهم القراية الأول؟!
طالبة 1: طول ما هما عيانين، ومش واكلين، ومش لابسين، عمرهم ما حايتعلِّموا.
إسماعيل: على فكرة، اليُفَط دي حاتعمل أزمة قماش في البلد.
زينب: إيه رأيكم، بدل ما نكتب ع القماش ده، نفصَّلهُ جلاليب للفلاحين.

من فيلم الزوجة الثانية
أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.