من فيلم غريب.. في بيتي
شحاتة: ده أنا كلت ضرب! ماكلوش حرامي جزم في جامع!
عفاف: أنا عارفة الناس دي جرى لها إيه؟! الكورة ما هي غالب يا مغلوب! والنبي حقهم يلغوها أحسن، ويفرَّجوهم على مصارعة التيران.

من فيلم الكرنك
طالب 1: كل ده قماش؟ كل دي يُفَط؟
زينب: والكلام ده مين اللي حايقراه بس في "ميت معقول"؟
إسماعيل: الفلاحين طبعًا.
زينب: مش لما نعلمهم القراية الأول؟!
طالبة 1: طول ما هما عيانين، ومش واكلين، ومش لابسين، عمرهم ما حايتعلِّموا.
إسماعيل: على فكرة، اليُفَط دي حاتعمل أزمة قماش في البلد.
زينب: إيه رأيكم، بدل ما نكتب ع القماش ده، نفصَّلهُ جلاليب للفلاحين.

من فيلم غريب.. في بيتي
عفاف لشحاتة: أنت راجل صعيدي أصيل.. أهي دي أخلاق القرية ولّا بلاش.

من فيلم الاختيار
شريفة: لو مش لاقي حاجة تقولها، ماتتكلمش أحسن! ماتدفعنيش أنا كمان إني أكذب على نفسي.

من فيلم الزوجة الثانية
أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.

من فيلم غريب.. في بيتي
عفاف: ممكن أعرف إيه اللي بتعمله ده؟!
شحاتة: يوجا، عشان الدم يوصل لنافوخي.
عفاف: ده إذا كان عندك دم أصلًا!