من فيلم أميرة.. حبي أنا
عادل: الله، إنتي كنتي مروحة ولّا إيه؟
أميرة: أبدًا، ليه؟
عادل: عشان معاكي الشنطة.
أميرة: آه، أصل النهاردة أول الشهر، وبيقولوا أن الشيطان شاطر!

من فيلم الثلاثة يحبونها
كمال: قوليلي قبلة.. إنتي مستظرفاني؟
إيمان: بشكل وحش.

من فيلم الزوجة الثانية
أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.

من فيلم غريب.. في بيتي
عفاف: ممكن أعرف إيه اللي بتعمله ده؟!
شحاتة: يوجا، عشان الدم يوصل لنافوخي.
عفاف: ده إذا كان عندك دم أصلًا!

من فيلم الزوجة الثانية
عتمان: الكلام اللى بتقوله نظيرة صدق؟
فاطمة: ليه؟ لهو أنت مش دريان بنفسك!
عتمان: ماحصلش.
فاطمة: أهو حصل.
عتمان: من إمتى؟
فاطمة: إسأل نظيرة.
عتمان: مِن مين؟
فاطمة: من جوزي.
عتمان: جوزك؟!
فاطمة: يمين بالله العظيم جوزي.
عتمان: آني يا بِت؟!
فاطمة: طب هو أنت جوزي؟! آني مرات أبو العلا.
عتمان: يا فاجرة!
فاطمة: آني لو كنت فاجرة، كنت بقيت مراتك ولو لليلة واحدة.
عتمان: آني هاأدبحك!
فاطمة: وهاتقول للناس إيه؟ دبحتهِه عشان جابت لى الواد؟!
عتمان: مش ابني.
فاطمة: كَدِّبنى قدام أهل البلد. قولهم إن ده ابن أبو العلا وإن..
عتمان: إخرسي إخرسي. إنتي لازم تشوفيلك حَلْ في الواد ده!
فاطمة: أما تعلقلي حبل المشنقة.

من فيلم غريب.. في بيتي
كوثر: هو إنتي دايمًا تتسكِّي كده؟!
عفاف: أعمل إيه بقى في حظي الهباب ده؟
كوثر: هو أنتي عندك حظ خالص؟! ياختي انزلي هاتيلك حظ من شارع الشواربي!