من فيلم دعاء الكروان
هنادي: لسّاكي صغيرة وجاهلة.. وويلي معاكي الويلين.. ودّي أقولك على كل حاجة، لكن خايفة لكون باعتدي على سنك..! ولو سكت أخاف بردو لتجعي في اللي وجعت فيه.. وتشربي المر وأنت فاكراه حلو..
آمنة: هنادي.. أوعي تكوني..-.
هنادي: - وشّي منكِ في التراب يا آمنة.

من فيلم ليلة القبض على فاطمة
سكينة: الفستان مش مجسم يا فاطمة!
فاطمة: حايتكسِّم إزاي يا سكينة؟!
سكينة: مطخَّني أوي يا فاطنة!
فاطمة: بقى الفستان اللي مطخِّنِك؟!

من فيلم موعد مع السعادة
ليلى: إحكيلي حدوتة الأول يا ماما..
آمال: طيب يا روحي، حاحكيلك حدوته.. كان فيه مرة واحد سلطان، السلطان ده كان عنده كل حاجة، وكان اسمه "سعيد" لكن هو مش سعيد.
ليلى: ليه يا ماما؟ مش كان بيلعب مع السلطانيات التانيين؟
آمال: هاها.. الظاهر كده..
ليلى: وبعدين؟
آمال: وبعدين قالوا له عشان يبقى سعيد، لازم يلبس قميص واحد سعيد.
ليلى: وبعدين؟
آمال: قعدوا يدوَّروا من هنا لهنا عشان يلاقوا واحد سعيد، أبدًا..
ليلى: وبعدين؟
آمال: وفين وفين، لقوا واحد راعي غنم، عجوز، وقاعد بيغني.
ليلى: وبعدين؟
آمال: قالوا له "يا راجل أنت، مبسوط؟"، قاللهم "أنا مبسوط وسعيد 24 قيراط"، قالوا له "طب فين قميصك"؟ بصوَّا التقوه ماعندوش قميص.
ليلى: وبعدين؟
آمال: خلاص! توتة توتة، فرغت الحدوته..
ليلى: أمال ليه كان مبسوط يا ماما؟
آمال: عشان كان عنده ناس يحبهم، وهما كمان يحبوه..

من فيلم دعاء الكروان
الباشمهندس: مالك؟ أنا حسدتِك؟
آمنة: أبدًا.. أصلي سمعت الكروان.
الباشمهندس: واللي يسمع الكروان يكشر؟! ده بيقول "المُلك لك لك يا صاحب الملك".
آمنة: ساعات.. وساعات بيقول "أشكيه لك لك لك يا صاحب المُلك".
الباشمهندس: دانتي متبحرة أوي في لغة الطيور.. وبيقول كده على مين؟
آمنة: أنا عارفة بقى..! أهو كلام..
الباشمهندس: أنا عمري ما خدت بالي بيقول إيه.
آمنة: هتاخد بالك إمتى..؟ في الفجر بتكون رايح في النوم.. وبالليل مانتاش فاضي له..
الباشمهندس: وأنا صغير كنت باصحاله بدري، عشان أوقعه في الفخ.
آمنة: طول عمرك وانت آسي.
الباشمهندس: ما تبقيش عبيطة.. لما بيقع في الفخ بيبقى في إيدي.. بيبقى ملكي.. لكن ع الشجرة هاعمل بيه ايه؟
آمنة: ع الشجرة وهو حر هيسمعك صوته.. لكن وهو في إيدك أسير عمره ما هايصفالك.
الباشمهندس: إنتي هتخليني أندم.
آمنة: وهينفع بإيه الندم..؟
الباشمهندس: يارتني عرفتك من زمان، كنتي علمتيني الشفقة.
آمنة: اتعلم الشفقة من غيري.. آني جلبي بجى حجر.
الباشمهندس: إنتي؟! قلبك حجر؟! إيه اللي قسّاه؟
آمنة: واحد زيَّك، كانت غِيته ينصب الفخ.
الباشمهندس: قوليلي يا آمنة.. إنتي سبقلك حبيتي..
آمنة: كان ليّ أخت حبت، وجتلها الحب.
الباشمهندس: إزاي؟ احكيلي..
آمنة: ما جُلت لك وجعت في الفخ.. وعندنا اللي تفرط ملهاش إلا الموت.
الباشمهندس: واللي حبها عمل ايه؟ سابها تموت؟
آمنة: الصياد عُمره ما بيفكر في الطير اللي وجع.. كل همه في الصيد الجديد..
الباشمهندس: لكن هي غلطانة.. ماحافظتش‎ على نفسها.
آمنة: دايمًا العصفور هو اللي غلطان، والصياد ماعليهش لوم..!

من فيلم موعد مع السعادة
إحسان لممدوح: كاك.. كاك.. كاك.. كاك.. كاك..

من فيلم نهر الحب
نوال: يعني مش عايز تطلقني بعد كل اللي قولتهولك؟!
طاهر: أيوة! لأني لو طلقتك، أبقى بشجَّع الزنا، باكافئ الخطيئة!
نوال: الخطيئة والزنا هما عيشتي معاك!
طاهر: إنتي إنسانة ضالة، منحلة! محتاجة للرثاء، مش للعقاب! أنا حاكون كريم وشهم معاكي إلى أبعد حد، أنا حانسى كل اللي حصل، حاسامحك، حاغفرلك كل ذنوبك، حاسعدك على التوبة والتكفير عن سيئاتِك. بس لازم تفهمي، أن ده مش ضعف أو عجز مني، بالعكس، دي قوة ومثالية.
نوال: أنت مش بتغفر ولا بتسامح، أنت بتنتقم! بتستغل أسمى معاني الحياة كوسيلة لأبشع طرق الانتقام.