من فيلم نهر الحب
نوال: أنت مابتزهقش أبدًا يا طاهر؟!
طاهر: من إيه؟
نوال: من أنك دايمًا معاك حق! من أنك مابتغلطش أبدًا؟! أنا لو مطرحك كنت أتمنى إني أغلط ولو مرة واحدة!
طاهر: يا عزيزتي نوال، الإنسان ممكن يغلط في حالة واحدة بس: لو فكَّر بقلبه.
نوال: يبقى عمرك ما حاتغلط أبدًا.

من فيلم آثار في الرمال
راجية: أنا متهيألي إن أنا في حلم.
سنية: الأحلام لذيذة وحلوة، طول ما الواحد مغمَّض عينيه.
راجية: حاغمَّض، عشان أشوف الحاجة اللي أنا عايزة أعيش فيها. بكرة حاشوف اللي الدنيا حاترغمني إني أشوفه!

من فيلم دعاء الكروان
آمنة: بجى ولا واحدة منهم عجباك؟!
الباشمهندس: إللي عاجباني واحدة تانية غير دول خالص..
آمنة: جاعدة في مصر بردك؟
الباشمهندس: جاعدة في جلبي.

من فيلم آثار في الرمال
راجية: (عن جهاز تسجيل) الحقيقة جهاز مهم أوي! الواحد يقدر يسجل عليه كل الألحان للي بتعجبه عشان يقدر يسمعها تاني!

من فيلم نهر الحب
نوال لممدوح: (صوت في خطاب) إذا عدت ولم تجدني، فاذكر أسطورة نهر الحب. فقد عشت مثله، أهِب ولا آخذ شيئًا. ولكن النهر خالدٌ لا يموت. اذكر الأسطورة، والحكمة من وراء هذه المعجزة السماوية، ليعي البشر السر العظيم.. فإن أرادوا حياةً، فليفسحوا في قلوبهم مجرى، لنهرٍ من الحب.

من فيلم ليلة القبض على فاطمة
فاطمة لنفيسة: إسمعي يا بت، أنا باعلِّمك عشان تكبري مش عشان تتكبَّري!