من فيلم دعاء الكروان
الباشمهندس: مالك؟ أنا حسدتِك؟
آمنة: أبدًا.. أصلي سمعت الكروان.
الباشمهندس: واللي يسمع الكروان يكشر؟! ده بيقول "المُلك لك لك يا صاحب الملك".
آمنة: ساعات.. وساعات بيقول "أشكيه لك لك لك يا صاحب المُلك".
الباشمهندس: دانتي متبحرة أوي في لغة الطيور.. وبيقول كده على مين؟
آمنة: أنا عارفة بقى..! أهو كلام..
الباشمهندس: أنا عمري ما خدت بالي بيقول إيه.
آمنة: هتاخد بالك إمتى..؟ في الفجر بتكون رايح في النوم.. وبالليل مانتاش فاضي له..
الباشمهندس: وأنا صغير كنت باصحاله بدري، عشان أوقعه في الفخ.
آمنة: طول عمرك وانت آسي.
الباشمهندس: ما تبقيش عبيطة.. لما بيقع في الفخ بيبقى في إيدي.. بيبقى ملكي.. لكن ع الشجرة هاعمل بيه ايه؟
آمنة: ع الشجرة وهو حر هيسمعك صوته.. لكن وهو في إيدك أسير عمره ما هايصفالك.
الباشمهندس: إنتي هتخليني أندم.
آمنة: وهينفع بإيه الندم..؟
الباشمهندس: يارتني عرفتك من زمان، كنتي علمتيني الشفقة.
آمنة: اتعلم الشفقة من غيري.. آني جلبي بجى حجر.
الباشمهندس: إنتي؟! قلبك حجر؟! إيه اللي قسّاه؟
آمنة: واحد زيَّك، كانت غِيته ينصب الفخ.
الباشمهندس: قوليلي يا آمنة.. إنتي سبقلك حبيتي..
آمنة: كان ليّ أخت حبت، وجتلها الحب.
الباشمهندس: إزاي؟ احكيلي..
آمنة: ما جُلت لك وجعت في الفخ.. وعندنا اللي تفرط ملهاش إلا الموت.
الباشمهندس: واللي حبها عمل ايه؟ سابها تموت؟
آمنة: الصياد عُمره ما بيفكر في الطير اللي وجع.. كل همه في الصيد الجديد..
الباشمهندس: لكن هي غلطانة.. ماحافظتش‎ على نفسها.
آمنة: دايمًا العصفور هو اللي غلطان، والصياد ماعليهش لوم..!

من فيلم دعاء الكروان
الباشمهندس: ماتخليش الأموات يحكموا على الأحياء بالشقاء.. إنسي اللي فات وفكري في المستقبل.
آمنة: المستقبل مات يوم ما ماتت هنادي.
الباشمهندس: يعني مش قادرة تسامحيني..؟ إنتي حياتي يا آمنة.. فُراقك والموت واحد.. لو تسيبيني تبقي برضه ماعدلتيش عن الانتقام.
آمنة: آني بانتقم من نفسي؛ لأني خنت هنادي وخُنت نفسي.. فكرت في يوم من الأيام أعذبك بالحب.. وما جاش على بالي أن السلاح اللي حاولت أجرحك بي هايجرحني أنا كمان.. ماتفتكرش إني خارجة سليمة.
الباشمهندس: كنت أفضَّل نظرة الحقد اللي كانت في عنيكي وانتي جنبي، ولا الشعور بحبك وانتي بعيدة عني.

من فيلم نهر الحب
نوال: (لنفسها) لم نحدد موعدًا للقائنا التالي، فقد اتفقنا على أن يكون ذلك صدفة.

من فيلم دعاء الكروان
هنادي: الغول يمّا.
آمنة: الغول يمّا الغول.
الأم: إيش.. لا تخافوا لا تخافوا.. هذا جطر سكة حديد.
آمنة: هو هذا الجطر.
الأم: إهه.
آمنة: وعلام جده بيجدح نار وشرار؟!
الأم: هو طبعه جدِه.. طول عمره جدِه.
هنادي: ورايح وين؟
الأم: داخل المدينة.
آمنة: يعمل إيش؟
الأم: ينزل راحلين وياخد راحلين.
آمنة: أمّال راحت فين الركايب يمّاي؟
الأم: ماحنا تركنا الجمال والحمير وداخلين على المدينة.. يوو ياما هتشوفوا في المدينة..هه.. يلّا!

من فيلم موعد مع السعادة
ليلى: إحكيلي حدوتة الأول يا ماما..
آمال: طيب يا روحي، حاحكيلك حدوته.. كان فيه مرة واحد سلطان، السلطان ده كان عنده كل حاجة، وكان اسمه "سعيد" لكن هو مش سعيد.
ليلى: ليه يا ماما؟ مش كان بيلعب مع السلطانيات التانيين؟
آمال: هاها.. الظاهر كده..
ليلى: وبعدين؟
آمال: وبعدين قالوا له عشان يبقى سعيد، لازم يلبس قميص واحد سعيد.
ليلى: وبعدين؟
آمال: قعدوا يدوَّروا من هنا لهنا عشان يلاقوا واحد سعيد، أبدًا..
ليلى: وبعدين؟
آمال: وفين وفين، لقوا واحد راعي غنم، عجوز، وقاعد بيغني.
ليلى: وبعدين؟
آمال: قالوا له "يا راجل أنت، مبسوط؟"، قاللهم "أنا مبسوط وسعيد 24 قيراط"، قالوا له "طب فين قميصك"؟ بصوَّا التقوه ماعندوش قميص.
ليلى: وبعدين؟
آمال: خلاص! توتة توتة، فرغت الحدوته..
ليلى: أمال ليه كان مبسوط يا ماما؟
آمال: عشان كان عنده ناس يحبهم، وهما كمان يحبوه..

من فيلم دعاء الكروان
آمنة: بجى ولا واحدة منهم عجباك؟!
الباشمهندس: إللي عاجباني واحدة تانية غير دول خالص..
آمنة: جاعدة في مصر بردك؟
الباشمهندس: جاعدة في جلبي.