من فيلم ليلة ساخنة
حورية: طب امسك.. خلِّي ده معاك رهن. لو ما دفعوش، حلال عليك..
سيد: البسي الخاتم! مش أنا اللي يقلَّع واحدة ست صيغتها..

من فيلم بتوقيت القاهرة
يحيى: أنت عارف أنا مادخَّنتش من إمتى؟
حازم: إمتى؟
يحيى: لأ، أنا اللي باسألك لأن أنا مش فاكر.

من فيلم حدوتة مصرية
عبد الهادي: أهو الناس تتسلى.
يحيى: أنا مش مسلواتي. روح شوف أراجوز تفهمه!
نبقة: ما أنت راخَر معلَّق على الجلاليب وناس حافية! يا أخي إعمل لك فيلم فيه فخفخة شوية.
يحيى: أبيع أحلام زي الأمريكان؟!
نبقة: وماله؟! على الأقل ننسى الهم اللي إحنا فيه.
يحيى: ويفضل راكِبنا!

من فيلم الكرنك
زائر الفجر 1: إنت! إنت!
إسماعيل: هه؟ مين؟
زائر الفجر 1: إنت إسماعيل الشيخ؟
إسماعيل: أيوة، فيه حاجة؟
زائر الفجر 3: قوم معانا.

من فيلم ليلة ساخنة
حورية: وهو الولد كده يا قلبي؟!
سيد: حكمة ربنا..
حورية: مالوش علاج؟
سيد: بيقولوا فيه مراكز في أمريكا وفي أوروبا، بيعملولهم تدريبات وعلاج نفسي.. بس مين يقدر عليها.. كل برغوت على أد دَمّه.. بس أنا مدخله مدرسة، ربنا يقدرني على مصاريفها..
حورية: ده نعمة.. عَيِّل زي ده يباركلك في بيتك وعافيتك.. وتخش الجنة على إيده..
سيد: أنا كمان روحي فيه من يوم أمه ما ماتت.. بقيت كل أهله.. وهو كل دُنيتي..
حورية: كنت بتحب أمه زي ما بتحبه كده؟
سيد: حُب إيه؟! الله لا يسيئك.. إحنا لينا فيه ولا نقدر عليه؟!
حورية: يعني اتجوزتها كده أورديحي؟!
سيد: كات سانداني.. بتتحامى فيَّ م الدنيا..
حورية: برضه القلب وما يريد.. هو ده اللي بيخلي الدنيا تِحلوّ في عينينا مهما كانت..

من فيلم غريب.. في بيتي
حنان: باتفرج عليك وأنت بتلعب.. ماتش يجنن.. يجنن.
شحاتة: بتتفرجي عليَّ وأنا بالعب؟!
حنان: أيوة.
شحاتة: بالعب فين؟! ده الماتش اتلعب يوم الجمعة اللي فاتت، واتذاع في التليفزيون، وخلص خلاص.
حنان: لا، مانا مسجلاه عندي.
شحاتة: جولي إكده.. مسجلاه على شريط وبتسمعيه.
حنان: هاها، أسمعه إيه؟! ده أنا باشوفه في التليفزيون، ع الفيديو كاسيت.
شحاتة: ويطلع إيه ال.. اللي جولتي عليه ده؟
حنان: اختراع.
شحاتة: يعني أجدر أشوف نفسي وأنا بالعب، بعد ما لعبت؟!
حنان: طبعًا..
شحاتة: سبحان الله.. علَّم الإنسان ما لم يعلم.