من فيلم غريب.. في بيتي
حنان: باتفرج عليك وأنت بتلعب.. ماتش يجنن.. يجنن.
شحاتة: بتتفرجي عليَّ وأنا بالعب؟!
حنان: أيوة.
شحاتة: بالعب فين؟! ده الماتش اتلعب يوم الجمعة اللي فاتت، واتذاع في التليفزيون، وخلص خلاص.
حنان: لا، مانا مسجلاه عندي.
شحاتة: جولي إكده.. مسجلاه على شريط وبتسمعيه.
حنان: هاها، أسمعه إيه؟! ده أنا باشوفه في التليفزيون، ع الفيديو كاسيت.
شحاتة: ويطلع إيه ال.. اللي جولتي عليه ده؟
حنان: اختراع.
شحاتة: يعني أجدر أشوف نفسي وأنا بالعب، بعد ما لعبت؟!
حنان: طبعًا..
شحاتة: سبحان الله.. علَّم الإنسان ما لم يعلم.

من فيلم ليلة ساخنة
سيد: باقولك إيه؟
صديق الخولي: قول.
سيد: أنا عايز ميتين جنيه الليلة، وهارجعهوملك بعد أسبوع. لازم أعمل عملية للولية حماتي.
صديق الخولي: من غير ما تحكي يا سيد.
سيد: هارجعهوملك يا صديق.. تلاتة بالله العظيم..-.
صديق: ..- يمين على يمينك أنا ماحتكم غير ع الخمسين جنيه دول: إيراد النهار كله والليل. هاخد منهم عشرين جنيه أجيب بنزين للعربية ولقمتين للعيال. وخُد أنت الباقي. سلامو عليكو.
سيد: مع السلامة.
صديق: باقولك إيه: إبقى حاسِب بقى ع القهوة وحجرين البوري. سلام.

من فيلم ليلة ساخنة
سيد: سبحان الله!
حورية: مهيَّصين على إيه بس؟! بيجيبوا راحة البال منين؟!
سيد: حد لاقي دلع ومايتدلعش؟! صباح الخير، اغرفي.. مساء الخير، سَقِّي!
حورية: ياعيني علينا!
سيد: إللي زينا، ينزل يشتغل ويطلع عين اللي خلِّفوه على ما يجيب الجنيه!
حورية: وياريته بيروَّح بيه!

من فيلم ليلة ساخنة
المجنون لحورية: ممنوع استعمال آلة التنبيه يا حمار! مابتعرفش تِقرا...؟! حاجة تشيِّب الأقرع! راكبين فوق بعض.. كاتمين على نَفَسي! حتى الرصيف اللي حِيلتي خدوه مَنِّي! أمشي فين أنا؟! يا سلام يا ربي، لو طلعلنا جناحات وأطير بيها وأطلع في السما..
سيد: تِفتكر هايسيبوك؟!
المجنون: أبدًا واللهي! هايطلعوا ورانا برضه في السما، والسما روخرة هاتبقى زحمة!
سيد (يعطيه مبلغًا من المال): طب خُد.. امسِك.
المجنون (رافِضًا): أنا عايز شيك!
سيد: أنت راجل شيك.

من فيلم ليلة ساخنة
حورية: وهو الولد كده يا قلبي؟!
سيد: حكمة ربنا..
حورية: مالوش علاج؟
سيد: بيقولوا فيه مراكز في أمريكا وفي أوروبا، بيعملولهم تدريبات وعلاج نفسي.. بس مين يقدر عليها.. كل برغوت على أد دَمّه.. بس أنا مدخله مدرسة، ربنا يقدرني على مصاريفها..
حورية: ده نعمة.. عَيِّل زي ده يباركلك في بيتك وعافيتك.. وتخش الجنة على إيده..
سيد: أنا كمان روحي فيه من يوم أمه ما ماتت.. بقيت كل أهله.. وهو كل دُنيتي..
حورية: كنت بتحب أمه زي ما بتحبه كده؟
سيد: حُب إيه؟! الله لا يسيئك.. إحنا لينا فيه ولا نقدر عليه؟!
حورية: يعني اتجوزتها كده أورديحي؟!
سيد: كات سانداني.. بتتحامى فيَّ م الدنيا..
حورية: برضه القلب وما يريد.. هو ده اللي بيخلي الدنيا تِحلوّ في عينينا مهما كانت..

من فيلم دماء على الأسفلت
د. سناء نور الحسن: أنا آسف.
سهام نور الحسن: آسف على إيه ولّا إيه؟! اللي أنت اتخليت عنهم يا أستاذ طابور وأنا في آخره!