من فيلم حدوتة مصرية
عبد الهادي: أهو الناس تتسلى.
يحيى: أنا مش مسلواتي. روح شوف أراجوز تفهمه!
نبقة: ما أنت راخَر معلَّق على الجلاليب وناس حافية! يا أخي إعمل لك فيلم فيه فخفخة شوية.
يحيى: أبيع أحلام زي الأمريكان؟!
نبقة: وماله؟! على الأقل ننسى الهم اللي إحنا فيه.
يحيى: ويفضل راكِبنا!

من فيلم بئر الخيانة
جابر: أنا فين؟
أحمد عزت: حمد الله عالسلامة يا حبيبي! إنت في مصر.

من فيلم ليلة ساخنة
سيد: باقولك إيه؟
صديق الخولي: قول.
سيد: أنا عايز ميتين جنيه الليلة، وهارجعهوملك بعد أسبوع. لازم أعمل عملية للولية حماتي.
صديق الخولي: من غير ما تحكي يا سيد.
سيد: هارجعهوملك يا صديق.. تلاتة بالله العظيم..-.
صديق: ..- يمين على يمينك أنا ماحتكم غير ع الخمسين جنيه دول: إيراد النهار كله والليل. هاخد منهم عشرين جنيه أجيب بنزين للعربية ولقمتين للعيال. وخُد أنت الباقي. سلامو عليكو.
سيد: مع السلامة.
صديق: باقولك إيه: إبقى حاسِب بقى ع القهوة وحجرين البوري. سلام.

من فيلم بتوقيت القاهرة
يحيى: أنت عارف أنا مادخَّنتش من إمتى؟
حازم: إمتى؟
يحيى: لأ، أنا اللي باسألك لأن أنا مش فاكر.

من فيلم غريب.. في بيتي
شحاتة: ده أنا كلت ضرب! ماكلوش حرامي جزم في جامع!
عفاف: أنا عارفة الناس دي جرى لها إيه؟! الكورة ما هي غالب يا مغلوب! والنبي حقهم يلغوها أحسن، ويفرَّجوهم على مصارعة التيران.

من فيلم دماء على الأسفلت
د. سناء نور الحسن: إيه اللي حصل خلاكي بالشكل ده؟!
سهام نور الحسن: حاجات كتير أوي يا سناء، باشوفها وباعرفها لأول مرة! اكتشفت أن المشاكل اللي بنعمل عليها أبحاثنا في المركز، مجرد مشاكل فلكلورية، قشة من ع الوش وبس! لكن اللي حاصل جوه، اللي حاصِل فعلًا في بلدنا.. ماحدش قرَّب منه! أنا اكتشفت إني زيَّك!
د. سناء نور الحسن: زيي؟
سهام نور الحسن: أنت اتغرَّبت وبعدت وأنفصلت وأنت بره، وأنا وحصللي نفس الشيء وأنا جوه!