من فيلم ليلة ساخنة
حورية: طب امسك.. خلِّي ده معاك رهن. لو ما دفعوش، حلال عليك..
سيد: البسي الخاتم! مش أنا اللي يقلَّع واحدة ست صيغتها..

من فيلم حدوتة مصرية
عبد الهادي: عصفور إيه؟! وطرطور إيه؟!
أحد أعضاء لجنة الرقابة: ماتشوفلك قصة تانية.
يحيى: ده أهم فيلم في حياتي.
أحد أعضاء لجنة الرقابة: على كل حال، سيادتك تاخد ده وتشوفلك طريقة فيه.
يحيى: هي دي الطريقة! ده شغل سنتين.
عبد الهادي: لا بقى! ماتتعالاش أوي ع اللجنة. هو أنت عايز تكتب على كيفك؟!
يحيى: أمال أكتب على كيفك أنت؟! أكتب أفكارك أنت؟! طبعًا لازم أكتب من خلال مخي أنا. إذا كان نفسك تكتب حاجة اتفضل اكتبها، ورد ع الأفكار اللي مش عاجباك، مش تكتمها!
عبد الهادي: بدل ما تحاول تكشف بلاوي التانيين، شوف بلاويك أنت. لو كتبت أنا، حضرتك تسيب البلد وتجري.

من فيلم غريب.. في بيتي
عفاف: استنى عندك! اتفضَّل ع الأوضة دي. يكون في عِلمك، مفيش أي كلام بيني وبينك! أنت فاهم؟ فاهم؟ فاهم؟!
شحاتة: حاضر، حاضر، حاضر.

من فيلم غريب.. في بيتي
كابتن علي: إياك وتلات حاجات: السهر والسجاير والخمرة.
شحاتة: بيني وبينهم ربنا.
كابتن علي: وحذاري من تلات حاجات: الإهمال، والغرور، والنسوان.
شحاتة: أعوذ بالله! احفظنا يا رب.

من فيلم حدوتة مصرية
يحيى: قدر! يعني اللي فينا، فينا.
مهدي: لأ، مصير، ممكن يتلوي، نعجنه.
يحيى: مصيرنا نيجي ألف كيلو وننضرب.
مهدي: أنت تقع م السطح مايحصلكش خدشة، ده قدر. لكن إحنا اخترنا نيجي هنا، ده الفرق: التجربة بتحدد المصير. هما هنا اختاروا الاستقلال: "إرادة"، و"مصير".. أنهي مليون ماتوا، ده قدر.

من فيلم ليلة ساخنة
سيد: باقولك إيه؟
صديق الخولي: قول.
سيد: أنا عايز ميتين جنيه الليلة، وهارجعهوملك بعد أسبوع. لازم أعمل عملية للولية حماتي.
صديق الخولي: من غير ما تحكي يا سيد.
سيد: هارجعهوملك يا صديق.. تلاتة بالله العظيم..-.
صديق: ..- يمين على يمينك أنا ماحتكم غير ع الخمسين جنيه دول: إيراد النهار كله والليل. هاخد منهم عشرين جنيه أجيب بنزين للعربية ولقمتين للعيال. وخُد أنت الباقي. سلامو عليكو.
سيد: مع السلامة.
صديق: باقولك إيه: إبقى حاسِب بقى ع القهوة وحجرين البوري. سلام.

من فيلم حدوتة مصرية
عبد الهادي: أهو الناس تتسلى.
يحيى: أنا مش مسلواتي. روح شوف أراجوز تفهمه!
نبقة: ما أنت راخَر معلَّق على الجلاليب وناس حافية! يا أخي إعمل لك فيلم فيه فخفخة شوية.
يحيى: أبيع أحلام زي الأمريكان؟!
نبقة: وماله؟! على الأقل ننسى الهم اللي إحنا فيه.
يحيى: ويفضل راكِبنا!

من فيلم غريب.. في بيتي
عفاف: ممكن أعرف إيه اللي بتعمله ده؟!
شحاتة: يوجا، عشان الدم يوصل لنافوخي.
عفاف: ده إذا كان عندك دم أصلًا!

من فيلم ليلة ساخنة
حورية: وهو الولد كده يا قلبي؟!
سيد: حكمة ربنا..
حورية: مالوش علاج؟
سيد: بيقولوا فيه مراكز في أمريكا وفي أوروبا، بيعملولهم تدريبات وعلاج نفسي.. بس مين يقدر عليها.. كل برغوت على أد دَمّه.. بس أنا مدخله مدرسة، ربنا يقدرني على مصاريفها..
حورية: ده نعمة.. عَيِّل زي ده يباركلك في بيتك وعافيتك.. وتخش الجنة على إيده..
سيد: أنا كمان روحي فيه من يوم أمه ما ماتت.. بقيت كل أهله.. وهو كل دُنيتي..
حورية: كنت بتحب أمه زي ما بتحبه كده؟
سيد: حُب إيه؟! الله لا يسيئك.. إحنا لينا فيه ولا نقدر عليه؟!
حورية: يعني اتجوزتها كده أورديحي؟!
سيد: كات سانداني.. بتتحامى فيَّ م الدنيا..
حورية: برضه القلب وما يريد.. هو ده اللي بيخلي الدنيا تِحلوّ في عينينا مهما كانت..