من فيلم حدوتة مصرية
عبد الهادي: عصفور إيه؟! وطرطور إيه؟!
أحد أعضاء لجنة الرقابة: ماتشوفلك قصة تانية.
يحيى: ده أهم فيلم في حياتي.
أحد أعضاء لجنة الرقابة: على كل حال، سيادتك تاخد ده وتشوفلك طريقة فيه.
يحيى: هي دي الطريقة! ده شغل سنتين.
عبد الهادي: لا بقى! ماتتعالاش أوي ع اللجنة. هو أنت عايز تكتب على كيفك؟!
يحيى: أمال أكتب على كيفك أنت؟! أكتب أفكارك أنت؟! طبعًا لازم أكتب من خلال مخي أنا. إذا كان نفسك تكتب حاجة اتفضل اكتبها، ورد ع الأفكار اللي مش عاجباك، مش تكتمها!
عبد الهادي: بدل ما تحاول تكشف بلاوي التانيين، شوف بلاويك أنت. لو كتبت أنا، حضرتك تسيب البلد وتجري.

من فيلم بتوقيت القاهرة
يحيى: (صوت في خطاب لأميرة) عارف أنك ممكن ماتسامحينيش.. على إني مشيت من غير ما أقول لك.. وعارف أنك محتاجالي أقف جنبك قدام أخوكي.. لكن اللي زيي، في الدنيا ماقودماهوش كتير.. مش فاضللي غير ذِكرى واحدة بس عايز ألاقيها.. الست اللي في الصورة.. طعم السعادة اللي فاضللي في صورة الست دي.. أقوى من أي حاجة تانية ممكن أعيشها دلوقتي.. إنتي الوحيدة اللي حاتفهميني.. خدي بالك من نفسك يا أميرة.. وأرجوكي، بلاش تتغيَّري.. خليكي زي ما أنتي..

من فيلم ليلة ساخنة
حورية: ابنك؟
سيد: بلوتي!
حورية: حرام عليك.. ده زي العسل.. إزيَّك يا حبيبي.. الله الله الله الله.. طب رُد السلام.. ابنك تقيل أوي يا باشمهندس..
سيد: في الأول بس.. لو خد عليكي، هاتقولي حقي برقبتي.

من فيلم غريب.. في بيتي
حنان: باتفرج عليك وأنت بتلعب.. ماتش يجنن.. يجنن.
شحاتة: بتتفرجي عليَّ وأنا بالعب؟!
حنان: أيوة.
شحاتة: بالعب فين؟! ده الماتش اتلعب يوم الجمعة اللي فاتت، واتذاع في التليفزيون، وخلص خلاص.
حنان: لا، مانا مسجلاه عندي.
شحاتة: جولي إكده.. مسجلاه على شريط وبتسمعيه.
حنان: هاها، أسمعه إيه؟! ده أنا باشوفه في التليفزيون، ع الفيديو كاسيت.
شحاتة: ويطلع إيه ال.. اللي جولتي عليه ده؟
حنان: اختراع.
شحاتة: يعني أجدر أشوف نفسي وأنا بالعب، بعد ما لعبت؟!
حنان: طبعًا..
شحاتة: سبحان الله.. علَّم الإنسان ما لم يعلم.

من فيلم حدوتة مصرية
يحيى: قال عاوزين تحرَّروا الناس! إزاي بقى لما احنا نفسنا مسجونين؟!

من فيلم ليلة ساخنة
حورية: ماتِقساش عليها.. إنت بتاكل منها عيش.
سيد: إكمن عربيتهم ماضية يعني؟! ماتخافيش.. المهم السوَّاق مش العجل.