من فيلم ليلة ساخنة
حورية: ماتِقساش عليها.. إنت بتاكل منها عيش.
سيد: إكمن عربيتهم ماضية يعني؟! ماتخافيش.. المهم السوَّاق مش العجل.

من فيلم بتوقيت القاهرة
يحيى: أسوأ حاجة، لما تتظاهر قُصاد حد أنك فاكره، وأنت مش عارف هو مين! والأفظع من كده لما الحد ده يكون ابنك..

من فيلم بتوقيت القاهرة
يحيى: أنت عارف أنا مادخَّنتش من إمتى؟
حازم: إمتى؟
يحيى: لأ، أنا اللي باسألك لأن أنا مش فاكر.

من فيلم حدوتة مصرية
آمال: حاياخدوا مخرج عربي ليه؟! الدنيا صفصفِت على مخرج عربي؟!
يحيى: في إسكندرية كنا ميت مِلة وميت جِنس، عمر ما حد سأل ليه!
آمال: كل ده اتغيَّر! الكل مشي! إسكندرية خلاص!

من فيلم ليلة ساخنة
سيد: سبحان الله!
حورية: مهيَّصين على إيه بس؟! بيجيبوا راحة البال منين؟!
سيد: حد لاقي دلع ومايتدلعش؟! صباح الخير، اغرفي.. مساء الخير، سَقِّي!
حورية: ياعيني علينا!
سيد: إللي زينا، ينزل يشتغل ويطلع عين اللي خلِّفوه على ما يجيب الجنيه!
حورية: وياريته بيروَّح بيه!

من فيلم حدوتة مصرية
عبد الهادي: عصفور إيه؟! وطرطور إيه؟!
أحد أعضاء لجنة الرقابة: ماتشوفلك قصة تانية.
يحيى: ده أهم فيلم في حياتي.
أحد أعضاء لجنة الرقابة: على كل حال، سيادتك تاخد ده وتشوفلك طريقة فيه.
يحيى: هي دي الطريقة! ده شغل سنتين.
عبد الهادي: لا بقى! ماتتعالاش أوي ع اللجنة. هو أنت عايز تكتب على كيفك؟!
يحيى: أمال أكتب على كيفك أنت؟! أكتب أفكارك أنت؟! طبعًا لازم أكتب من خلال مخي أنا. إذا كان نفسك تكتب حاجة اتفضل اكتبها، ورد ع الأفكار اللي مش عاجباك، مش تكتمها!
عبد الهادي: بدل ما تحاول تكشف بلاوي التانيين، شوف بلاويك أنت. لو كتبت أنا، حضرتك تسيب البلد وتجري.