من فيلم حدوتة مصرية
يحيى: الكلام اللي حاقولهولِك دلوقتي، مايلزمكيش بأي حاجة. آمال، أنا..
آمال: يحيى، تتجوزني؟
يحيى: يخرب بيتك! سرقتي الكلمة من بُقي! كومبارس أنا بقى، ماتسيبيليش حوار أقوله!

من فيلم ليلة ساخنة
المجنون لحورية: ممنوع استعمال آلة التنبيه يا حمار! مابتعرفش تِقرا...؟! حاجة تشيِّب الأقرع! راكبين فوق بعض.. كاتمين على نَفَسي! حتى الرصيف اللي حِيلتي خدوه مَنِّي! أمشي فين أنا؟! يا سلام يا ربي، لو طلعلنا جناحات وأطير بيها وأطلع في السما..
سيد: تِفتكر هايسيبوك؟!
المجنون: أبدًا واللهي! هايطلعوا ورانا برضه في السما، والسما روخرة هاتبقى زحمة!
سيد (يعطيه مبلغًا من المال): طب خُد.. امسِك.
المجنون (رافِضًا): أنا عايز شيك!
سيد: أنت راجل شيك.

من فيلم غريب.. في بيتي
عفاف: استنى عندك! اتفضَّل ع الأوضة دي. يكون في عِلمك، مفيش أي كلام بيني وبينك! أنت فاهم؟ فاهم؟ فاهم؟!
شحاتة: حاضر، حاضر، حاضر.

من فيلم غريب.. في بيتي
شحاتة: ده أنا كلت ضرب! ماكلوش حرامي جزم في جامع!
عفاف: أنا عارفة الناس دي جرى لها إيه؟! الكورة ما هي غالب يا مغلوب! والنبي حقهم يلغوها أحسن، ويفرَّجوهم على مصارعة التيران.

من فيلم حدوتة مصرية
يحيى: قدر! يعني اللي فينا، فينا.
مهدي: لأ، مصير، ممكن يتلوي، نعجنه.
يحيى: مصيرنا نيجي ألف كيلو وننضرب.
مهدي: أنت تقع م السطح مايحصلكش خدشة، ده قدر. لكن إحنا اخترنا نيجي هنا، ده الفرق: التجربة بتحدد المصير. هما هنا اختاروا الاستقلال: "إرادة"، و"مصير".. أنهي مليون ماتوا، ده قدر.

من فيلم حدوتة مصرية
عبد الهادي: أهو الناس تتسلى.
يحيى: أنا مش مسلواتي. روح شوف أراجوز تفهمه!
نبقة: ما أنت راخَر معلَّق على الجلاليب وناس حافية! يا أخي إعمل لك فيلم فيه فخفخة شوية.
يحيى: أبيع أحلام زي الأمريكان؟!
نبقة: وماله؟! على الأقل ننسى الهم اللي إحنا فيه.
يحيى: ويفضل راكِبنا!