آمنة

من فيلم دعاء الكروان
آمنة (باكية): وين هنادي يامّاي..؟ وين هنادي يمّاي..
الأم: هادا أمر الله يا بنتي!
آمنة: أمر الله ولّا أمر خالي يمّاي؟! ربنا ما أمر بالشر.
الأم: خالكي غدرني.. وعدني بالستر وهو ناوي على الشر.
آمنة: وانتي نويتي معه.. جتلتيها معه.. جتلتوها انتو الاتنين!

من فيلم دعاء الكروان
آمنة: وين هنادي يا خال؟
الخال: هنادي راحت في الوبى.. وانتي تعلمي هدا..
آمنة: داري اديك يا خال.. دم هنادي بينجط منهم..
الخال: جلتلك هنادي راحت في الوبا!

من فيلم دعاء الكروان
آمنة: أصل اختي كانت في الخطر، وخدناها وروحنا البلد.
زوجة المأمور: وازيها دلوقت؟
آمنة: قابلت ربها يا ست.. قابلت ربها.

من فيلم دعاء الكروان
خديجة: طيب، تصبحي على خير يا ماما.
زوجة المأمور: مع السلامة.
المأمور: وانتي من أهله يا حبوبة.. فِكرِك لاحظت حاجة؟
زوجة المأمور: ما افتكرش.. دي علانيتها.. وزي القطة المغمضة.
المأمور: طالعة لأبوها.
خديجة (لآمنة): آمنة، آمنة.. خلاص عرفت اللي كانوا بيخبوه عليَّ.. العرسان كل يوم بتتقدم لبابا.. وهو خلاص قرر يجوزني.
آمنة: مبروك يا ست هانم.. ربنا يهنيكي.
خديجة: لا لسة بدري.. أنا لسة ما وافقتش.. لازم يعجبني أولًا.. دانا اللي هتجوز، مش بابا.. أولًا: لازم يكون رفيع.. ثانيًا: لازم يكون شنبه مبروم زي شنب بابا.. ثالثًا: يكون غني، عشان كل يوم جمعة يوديني مصر، ويسمعني سلامة حجازي، ويوديني اللونا بارك.

من فيلم دعاء الكروان
الباشمهندس: إنتي سمعتي على حاجة اسمها "الخمرة"؟
آمنة: أيوة.. اللي بيسكروا بيها..
الباشمهندس: أنا بقى بالليل باخد كاسين.. وبعد ما بشرب، جتتي مبتبقاش خالصة.. ببقى واحد تاني..
آمنة: يبقى بقى العتب مش عليك.. ع الخمرة..
الباشمهندس: أهو كده.. ما قولنا بقى مفيش داعي تترعشي.. خافي مني بس بالليل..

من فيلم دعاء الكروان
الباشمهندس: كل ما تيجي جنبي تتشطري يعني وعاملة واعية..!
آمنة: سبني يا سيدي، اعمل معروف يا سيدي!
الباشمهندس: فلفصي بقى من هنا للصبح! عرفتي بقى إني سايبك بكيفي، مش شطارة منك..! كان غيرك أشطر.. هاهاها..

من فيلم دعاء الكروان
الباشمهندس: انت يا إما على نياتك أوي.. يا إما سِمَّاوية أوي.. اشربي..
آمنة: لا يا سيدي اعمل معروف!
الباشمهندس: بقولك اشربي.
آمنة: كفاية يا سيدي، أحسن أدوخ.
الباشمهندس: تدوخي.. ودي حاجة وحشة..؟! أنا كل يوم بشرب إزازة زي دي عشان أدوخ.. وانسى..
آمنة: تنسى ايه يا سيدي؟
الباشمهندس: أنسى نفسي.. أنا الانسان الوحيد اللي ما باحبش أقابله.. دايمًا متخاصمين.
آمنة: ليه؟
الباشمهندس: كل ماجي أحط راسي على المخدة: سين وجيم! ولوم!
آمنة: وليه اللوم؟ أنت بتعمل حاجة تغضب ربنا؟!
الباشمهندس: مش عن قصد.. أخطائي زي ما تقولي نوع من الهروب.. دي مسائل ما تفهميش فيها إنتي.. لكن هاكلمك عنها بردو بدل ماكلم نفسي..
آمنة: ساعات الواحد بيكلم الحيطة.. وبتهرب من إيه؟
الباشمهندس: م الوحدة.. في إيه في الريف غير الوحدة والملل؟ الأيام كلها زي بعضها.. في الصبح مرور على الجسور، وبالليل لعب الورق في النادي.. مع نفس الأصحاب.. همّا كمان الملل صابِبهم في قوالب.. عقولهم وقفت وأفكارهم اتجمدت.. زي اللي تكون مسجلة على اسطوانات.. يعيدوا النكتة الجديدة، ويضحكوا عليها من جديد.. ويكرروا الحكايات الوضيعة.. وتسليتهم الوحيدة: أن واحدة تروح، وواحدة تيجي.. تاخد دور البطولة في الحكاية الوضيعة..
آمنة: هنادي تروح وسكينة تيجي!

من فيلم دعاء الكروان
الباشمهندس: تعرفي أن فيكي حاجة من هنادي؟
آمنة: اشبه لها؟
الباشمهندس: في طبعها.. كانت نِفَرية زيك.. بس إنتي راسك ناشفة عنها.. هنادي داخت من أول كاس.. لكن إنتي باين عليكي تدوَّخي بلد..

من فيلم دعاء الكروان
الباشمهندس: يا بني آدم، إذا كنتي خايفة على نفسك.. تعالي نامي على السجادة اللي قدام سريري.. أنا معنديش مانع.
آمنة: تعيش.. لكن آني عندي مانع..
الباشمهندس: والمانع ده يبقى ايه؟
آمنة: لما بتشرب جتتك ما بتبقاش خالصة.. أنت لسة قايل كده النهاردة الصبح..
الباشمهندس: لا، ما هو الكلام اللي أقولهولك بالنهار متصدقيهوش بالليل.
آمنة: واللي تقوله بالليل ماصدقهوش بالنهار؟!

من فيلم دعاء الكروان
زنوبة: يا بت ما تبقيش عبيطة.. الرجالة زي السمك.. يبصوا للطعم وميشوفوش الصنارة.. فيه راجل ييجي بالكلمة الحلوة.. وفيه واحد ييجي بالنظرة النعسانة في العيون الكحيلة.. المهم يلقط الطعم وبعد كده تسحبيه زي ما.
انت عايزة.. تسقيه المر، تسقيه الحلو.. إنتي وكيفك..
آمنة: مش المهندس.. ده سيد وانا خدامة!
زنوبة: ممم.. ما تبجيش عبيطة.. في البيت اللي مجفول على اتنين الجمال هو صاحب السيادة.. والراجل مهما عِلي مجامه، مادام مافيش حد شايفه، هايترمي ويتمرمغ تحت رجليكي.
آمنة: وإيه اللي يزنجه على كده؟
زنوبة: آآآه.. الحب.. الحب ياما بيذل..
زنوبة: صديته.. إعمل إيه ياختي.. أصل الواحد جلبه مش في ايده..

من فيلم دعاء الكروان
الباشمهندس: آه ياني أنا من غرامك.
آمنة: غرامي؟! تكونش عايز تضحك على عقلي بكلمتين؟!
الباشمهندس: ليه بس هو مين أحلى منك؟
آمنة: انشالله تتهنى.. أنا صحيح غشيمة، لكن فاهمة إن الحلوين كتير.
الباشمهندس: أنا مش شايف حد غيرك في قلبي.

من فيلم دعاء الكروان
آمنة: بس هو من يوم ما رجع من مصر، وهو متغير.. بعد ما كان تحت رجليَّ حاسة أنه بيفلت مني..
زنوبة: نوّلتيه المراد..؟
آمنة: يا ندامة.. ولا خليته يلمس ضفري.
زنوبة: جدعة.. بس خدي بالك جوي.. الراجل من دول، إذا ما طلش المراد يزهج.. يطفش..
آمنة: أروحشي للشيخ وهدان يعمله عَمَل؟
زنوبة: العمل عملك إنتي.. اضربي ولاجي.. شدي وارخي..
آمنة: آني خايفة يا خالة زنوبة لا الغندورة بتاعة مصر تخطفه مني..
زنوبة: غندورة أيه؟
آمنة: اللي لطختله منديله بالهباب الأحمر!
زنوبة: شوفوا يا خواتي البت.. تكونيش غويتيه ومخبية عليّ؟!
آمنة: آني أحبه؟!
زنوبة: أمال مالك ملهوفة جوي عليه كده ليه؟!
آمنة: عشان مش عيزاه يِفِر من إيدي.
زنوبة: آآه.. حِليتلك اللعبة.. القطة المغمضة فتحت..
آمنة: هاعمل إيه يا خالة.. رسيني..
زنوبة: زَوِّديله الطُّعم شوية.. بس خلي بالك من نفسك؛ لا النار اللي عايزة تحرجيه بيها، تحرجك..