من فيلم خرج ولم يَعُد
عطية: يا مدموازيل أنا ماعنديش استعداد أعمل غسيل معدة تاني!
خيرية: طب حتى طبق شوربة..
عطية: إذا كان كده معلش..
خيرية: تحب تشرب شوربة إيه؟
عطية: مياه! شوربة مياة! لا زبدة ولا سمنة ولا حاجة خالص!

من فيلم أنا وأنت.. وساعات السفر
سلوى: هه هه هه.. عزت..
عزت: مم؟
سلوى: شايفاك بِتْدُور حوالين نفسك زي البقرة دي.. الفرق: أن هي عينيها مِغَميَّة، وأنت لأ.
عزت: وافرض؟! بشرط أن يكون دوراني مفيد، زي دوران البقرة دي.. بتطلَّع مياه عشان تروي الزرع. فيه ناس دورانهم مالوش أيّ فايدة، لا لنفسهم، ولا لغيرهم.

من فيلم خرج ولم يَعُد
عطية: أنا ماشوفتش في حياتي ناس بالشكل ده! دول وحوش!
الحاج عوضين: يا بني الخير عندهم كتير.. ماياكلوش زي الوحوش ليه؟!

من فيلم خرج ولم يَعُد
عطية: .. أنا قصدي أن مش باين عليكي أنك زعلانة عشان ماكملتيش دراستك.
خيرية: وأزعل ليه بس؟ أنا طالعة لأمي بالظبط.. فلاحة.. أنت عارف أن ماما فلاحة بنت فلاح؟
عطية: أيوة عارف.
خيرية: طب إيه رأيك فيها؟
عطية: ست عظيمة.
خيرية: أهو أنا كمان بِت عظيمة.
عطية: (لنفسه) بنت مجنونة زي أبوها تمام.

من فيلم خرج ولم يَعُد
كمال: أنا عرفت من الحاج عوضين أنك واخد أجازة شهرين.. مصالح إيه بقى اللي وراك؟!
عطية: أنا مش واخد على عيشة الأرياف.. طول عمري واخد على عيشة القاهرة..
كمال: باردون يا أستاذ عطية، أنا مش قصدي أهينك.. أنا لما كنت في سنك كده كنت عايش في لندن وباريس ونيويورك.. صدقني.. مارتحتش غير هنا، في العزيزية.
عطية: جايز.. بس كل إنسان له طبعه..
كمال: أنا لما آخد عليك حابقى أحكيلك تاريخ حياتي. بس عايزوك تنسى حكاية نزولك مصر.
عطية: هو حضرتك محتاجني هنا في حاجة؟
كمال: أنا هنا مش ناقصني حاجة أبدًا.. إنما أحيانًا أحتاج لإنسان، ياكل معايا، أتكلم معاه.. إنسان تاني غير مراتي وبناتي.. راجل زيي زيه.. فهمت..؟
عطية: الحقيقة مش أوي!
كمال: آه.. بكرة لما تبقى في سني حاتفهم كل حاجة.. أنا كل اللي باطلبه منك تقعد معانا هنا يومين تلاتة.. دي خدمة مش حانسهالك طول عمري..
عطية: بس أنا لا باعرف أقول نُكت، ولا أحكي حكايات!
كمال: أنا مش طالِب منك تمثل لي دور "شهرزاد"! أنا عاوزك تفتحلي قلبك.. وأفتحلك قلبي..

من فيلم حب.. في الزنزانة
مخبر 1: كنت فين لغاية دلوقتي؟
فاروق: مفيش حد في الدنيا من حقه يسألني السؤال ده غير مراتي.