من فيلم خرج ولم يَعُد
عطية للحاج عوضين: ماتخافش يا حاج. الطبق ده إن شاء الله حايتمسح.

من فيلم أنا وأنت.. وساعات السفر
عزت: اللي يبيع الحب، مايصحش يندم عليه بعد كده.. مهما كان التمن.

من فيلم خرج ولم يَعُد
عطية: .. أنا قصدي أن مش باين عليكي أنك زعلانة عشان ماكملتيش دراستك.
خيرية: وأزعل ليه بس؟ أنا طالعة لأمي بالظبط.. فلاحة.. أنت عارف أن ماما فلاحة بنت فلاح؟
عطية: أيوة عارف.
خيرية: طب إيه رأيك فيها؟
عطية: ست عظيمة.
خيرية: أهو أنا كمان بِت عظيمة.
عطية: (لنفسه) بنت مجنونة زي أبوها تمام.

من فيلم أنا وأنت.. وساعات السفر
المرأة الفقيرة: زمان، الناس كانت حاجة تانية. عندنا في البلد في الأمثال بيقولوا: "الناس لبعضيها". لكن يظهر أنتم في بلدكم ماعندكوش أمثال خالص!
عزت: الزمن بيجري يا حاجة.
المرأة الفقيرة: لا بيفسَد.

من فيلم خرج ولم يَعُد
كمال: أنا عرفت من الحاج عوضين أنك واخد أجازة شهرين.. مصالح إيه بقى اللي وراك؟!
عطية: أنا مش واخد على عيشة الأرياف.. طول عمري واخد على عيشة القاهرة..
كمال: باردون يا أستاذ عطية، أنا مش قصدي أهينك.. أنا لما كنت في سنك كده كنت عايش في لندن وباريس ونيويورك.. صدقني.. مارتحتش غير هنا، في العزيزية.
عطية: جايز.. بس كل إنسان له طبعه..
كمال: أنا لما آخد عليك حابقى أحكيلك تاريخ حياتي. بس عايزوك تنسى حكاية نزولك مصر.
عطية: هو حضرتك محتاجني هنا في حاجة؟
كمال: أنا هنا مش ناقصني حاجة أبدًا.. إنما أحيانًا أحتاج لإنسان، ياكل معايا، أتكلم معاه.. إنسان تاني غير مراتي وبناتي.. راجل زيي زيه.. فهمت..؟
عطية: الحقيقة مش أوي!
كمال: آه.. بكرة لما تبقى في سني حاتفهم كل حاجة.. أنا كل اللي باطلبه منك تقعد معانا هنا يومين تلاتة.. دي خدمة مش حانسهالك طول عمري..
عطية: بس أنا لا باعرف أقول نُكت، ولا أحكي حكايات!
كمال: أنا مش طالِب منك تمثل لي دور "شهرزاد"! أنا عاوزك تفتحلي قلبك.. وأفتحلك قلبي..

من فيلم أنا وأنت.. وساعات السفر
عزت: أنا عايز أقول لك على حاجة مهمة أوي: أنا رأيي أن الضحك زي البُكا بالظبط.. الاتنين شعور إنساني.. إحساس جيَّاش.. فيه ناس سعادتها في البُكا زي سعادتها في الضحك.. أنا من الناس دي.. إنتي مابتشوفيش الأطفال وهما بيعيَّطوا ويضحكوا في نفس اللحظة؟ ليه؟
سلوى: ليه؟
عزت: عشان جوَّاهم براءة.. فهمتي؟