من فيلم نحن لا.. نزرع الشوك
حمدي: لو خدت الكفاءة، سنتين، آخد البكالوريا، وأدخل الجامعة.
سيدة: هي لسة فيها بكاروريا؟

من فيلم نحن لا.. نزرع الشوك
حمدي: أنا أعرف أعلمك إزاي.
سيدة: وتخليني أقول "سمس" زي ما بتقولوها؟
حمدي: حاخليكي تقولي "شمس" و"قمر" و"نجوم".. روحي إنتي نامي.
سيدة: هو بقى فيها نوم؟ ماطلعت.
حمدي: هي إيه اللي طلعت؟
سيدة: إيه.. السمس.

من فيلم نحن لا.. نزرع الشوك
أميرة: خدي ياختي خدي.
سيدة: إيه ده؟
أميرة: دي حاجة حاتهديكي أوي، بس اشربيها مرة واحدة. (تسعل سيدة) أيوة كده، دلوقتي تهدي وتستريَّحي خالص. ياللا، كملي الكوباية.
سيدة: لأ، كفاية كده.
أميرة: اسمعي كلامي، أنا عارفة أن طعمه وحش، لكن حايهديكي أوي.. ياللا.. عشان خاطري.. أيوة كده.. اشربي.. اشربي..

من فيلم مراتي مدير عام
عصمت: على فكرة..
أبو الخير: أيوة يا فندم؟ نعم؟ نعم؟ نعم يا فندم؟
عصمت: هما سموك أبو الخير ليه؟!
أبو الخير: من أعمالي يا فندم.. أيوالله من أعمالي.

من فيلم نحن لا.. نزرع الشوك
حمدي: جايباها لمين دي يا سيدة؟
سيدة: كوثر وأمها جُم م الصعيد.
حمدي: طب وجايبة إزازة واحدة ليه؟
سيدة: ماحنا دايمًا بنعمل كده، بنجيب إزازة واحدة، ونحطها في كوبايتين، ونحط عليهم تلج.
حمدي: روحي هاتي إزازة تانية بلاش فضايح!

من فيلم مراتي مدير عام
عصمت: مفيش معنى أبدًا إننا نشتري مباني جديدة، وتفكيرنا يفضل قديم! الحكومة مابتبخلش علينا بحاجة أبدًا، إنما إحنا بنبخل.. مفيش موظف عايز يتحمل مسئولية.. كلنا بنهرب م المسئولية.. بنهرب منها باللايحة والروتين والقوانين.. اللايحة هنا (تشير إلى المخ)، والقانون هنا.. لازم تكون عندنا الجرأة علشان ننفذ اللي نعتقد أنه للصالح العام..