من فيلم موعد مع الحياة
فاطمة: قوليله مش موجودة.
زهرة: ردي عليه والنبي!
فاطمة: هي كلمة واحدة، قوليله مش موجودة!
زهرة: حاضر. (تكلم ممدوح في التليفون) الست بتقول لحضرتك "مش موجودة". يقطعني! لا لا لا لأ، عايزة تقول لحضرتك أنها ماهياش موجودة! يوه! برضه لأ!

من فيلم نحن لا.. نزرع الشوك
سيدة: (لنفسها) لقيتي الكيَّال اللي يلمِّك!

من فيلم مراتي مدير عام
حسين: كل يوم قلقاس؟! كل يوم قلقاس؟!
عصمت: ده مش قلقاس يا حبيبي! دي مكرونة بالفراخ!
حسين: كل يوم فراخ! كل يوم فراخ! دي ماباقيتش عيشة!

من فيلم نحن لا.. نزرع الشوك
حمدي: والله زمان يا سيدة..
سيدة: أيام ماتتنسيش.
حمدي: كانت أيام حلوة.
سيدة: أنا ماعيشتش غيرها.. دي كل عمري..

من فيلم نحن لا.. نزرع الشوك
حمدي: أنا أعرف أعلمك إزاي.
سيدة: وتخليني أقول "سمس" زي ما بتقولوها؟
حمدي: حاخليكي تقولي "شمس" و"قمر" و"نجوم".. روحي إنتي نامي.
سيدة: هو بقى فيها نوم؟ ماطلعت.
حمدي: هي إيه اللي طلعت؟
سيدة: إيه.. السمس.

من فيلم نحن لا.. نزرع الشوك
بائعة الخضراوات: معلش يا اختي، عشان خاطر جوزك.
سيدة: جوزي؟! جوز الشوم، جوز اللوم! دي ماكانتش جوازة، دي كانت جنازة!