من فيلم مراتي مدير عام
عصمت: على فكرة..
أبو الخير: أيوة يا فندم؟ نعم؟ نعم؟ نعم يا فندم؟
عصمت: هما سموك أبو الخير ليه؟!
أبو الخير: من أعمالي يا فندم.. أيوالله من أعمالي.

من فيلم نحن لا.. نزرع الشوك
أميرة: يا باي! مبلمة كده ليه؟! هو يعني كان جرى إيه؟! قال على رأي المثل: "كنا، وكان، وكان ياما كان"! أهو كله محصَّل بعضه.
سيدة: ليكي حق! كله محصَّل بعضه!

من فيلم المرأة المجهولة
فاطمة: أنا في الحقيقة يا دكتور أحمد.. كان لازم أقول لك.. يعني.. مكسوفة من نفسي.. و.. ومن..
أحمد: مكسوفة إنك خرجتي معايا؟! يا ستي الدنيا اتغيرت.. إحنا دلوقتي سنة تلاتين!

من فيلم نحن لا.. نزرع الشوك
بائعة الخضراوات: معلش يا اختي، عشان خاطر جوزك.
سيدة: جوزي؟! جوز الشوم، جوز اللوم! دي ماكانتش جوازة، دي كانت جنازة!

من فيلم نحن لا.. نزرع الشوك
أميرة: خدي ياختي خدي.
سيدة: إيه ده؟
أميرة: دي حاجة حاتهديكي أوي، بس اشربيها مرة واحدة. (تسعل سيدة) أيوة كده، دلوقتي تهدي وتستريَّحي خالص. ياللا، كملي الكوباية.
سيدة: لأ، كفاية كده.
أميرة: اسمعي كلامي، أنا عارفة أن طعمه وحش، لكن حايهديكي أوي.. ياللا.. عشان خاطري.. أيوة كده.. اشربي.. اشربي..

من فيلم أنت حبيبي
ياسمينة: يا سم!
فريد: يا دم! ليلتك سودا.
ياسمينة: ليلتك مهببة.
فريد: يا باي!
ياسمينة: يا ساتر!
فريد: باكرهك من كل قلبي.
ياسمينة: باكرهك زي العمى.
بهيجة: واخدة بالك؟ حاياكلوا بعض من كُتر الحب.
والدة ياسمينة: يا صلاة النبي أحسن الاتنين زي القمر، يا حلاوتهم.