من فيلم دعاء الكروان
الباشمهندس: مالك؟ أنا حسدتِك؟
آمنة: أبدًا.. أصلي سمعت الكروان.
الباشمهندس: واللي يسمع الكروان يكشر؟! ده بيقول "المُلك لك لك يا صاحب الملك".
آمنة: ساعات.. وساعات بيقول "أشكيه لك لك لك يا صاحب المُلك".
الباشمهندس: دانتي متبحرة أوي في لغة الطيور.. وبيقول كده على مين؟
آمنة: أنا عارفة بقى..! أهو كلام..
الباشمهندس: أنا عمري ما خدت بالي بيقول إيه.
آمنة: هتاخد بالك إمتى..؟ في الفجر بتكون رايح في النوم.. وبالليل مانتاش فاضي له..
الباشمهندس: وأنا صغير كنت باصحاله بدري، عشان أوقعه في الفخ.
آمنة: طول عمرك وانت آسي.
الباشمهندس: ما تبقيش عبيطة.. لما بيقع في الفخ بيبقى في إيدي.. بيبقى ملكي.. لكن ع الشجرة هاعمل بيه ايه؟
آمنة: ع الشجرة وهو حر هيسمعك صوته.. لكن وهو في إيدك أسير عمره ما هايصفالك.
الباشمهندس: إنتي هتخليني أندم.
آمنة: وهينفع بإيه الندم..؟
الباشمهندس: يارتني عرفتك من زمان، كنتي علمتيني الشفقة.
آمنة: اتعلم الشفقة من غيري.. آني جلبي بجى حجر.
الباشمهندس: إنتي؟! قلبك حجر؟! إيه اللي قسّاه؟
آمنة: واحد زيَّك، كانت غِيته ينصب الفخ.
الباشمهندس: قوليلي يا آمنة.. إنتي سبقلك حبيتي..
آمنة: كان ليّ أخت حبت، وجتلها الحب.
الباشمهندس: إزاي؟ احكيلي..
آمنة: ما جُلت لك وجعت في الفخ.. وعندنا اللي تفرط ملهاش إلا الموت.
الباشمهندس: واللي حبها عمل ايه؟ سابها تموت؟
آمنة: الصياد عُمره ما بيفكر في الطير اللي وجع.. كل همه في الصيد الجديد..
الباشمهندس: لكن هي غلطانة.. ماحافظتش‎ على نفسها.
آمنة: دايمًا العصفور هو اللي غلطان، والصياد ماعليهش لوم..!

من فيلم نهر الحب
نوال: (لنفسها) ومرَّت السنين، وأنا أعيشُ كزوجةٍ لصاحب المعالي، كجزيرة محاصرة بالتقاليد والمظاهر.. بالتصنُّع والتكلف.. نسيت خلالها ابتسامة القلب، وبتُّ لا أعرِف سوى ابتسامة الأسنان والشفاة!

من فيلم دعاء الكروان
آمنة: سيدي..!!
الباشمهندس: دي أسعد لحظة في حياتي.. إني شايف في عنيكي الحب.. حياتي مش غالية عليكي.. هي المهر الوحيد، اللي كان ممكن يصالحنا على بعض.

من فيلم آثار في الرمال
إبراهيم: راجية، بصيلي..
راجية: مش عايزة أفتَّح عينيَّ.. متهيَّألي إن باحلم، وخايفة أصحى لا يروح الحلم الجميل اللي أنا فيه.
إبراهيم: الحلم الجميل اللي أنتي فيه حايفضل على طول، مش حاينتهي أبدًا.. راجية، قولي إنك بتحبيني..
راجية: لأ مش حاقول! لأن اللي عندي ده مش حب، أكتر من حب.. الواحد لما يحب حاجة، تكون غريبة عنه.. لكن أنت في دمي.. في كياني.. فهِمت أنت إيه بالنسبة لي؟
إبراهيم: أنا كمان حاسس إني ماقدرش أستغنى عنك.. حاسس أن حياتي مُستمدة منك.. من غيرك ماقدرش أعيش أبدًا..

من فيلم موعد مع السعادة
ليلى: إحكيلي حدوتة الأول يا ماما..
آمال: طيب يا روحي، حاحكيلك حدوته.. كان فيه مرة واحد سلطان، السلطان ده كان عنده كل حاجة، وكان اسمه "سعيد" لكن هو مش سعيد.
ليلى: ليه يا ماما؟ مش كان بيلعب مع السلطانيات التانيين؟
آمال: هاها.. الظاهر كده..
ليلى: وبعدين؟
آمال: وبعدين قالوا له عشان يبقى سعيد، لازم يلبس قميص واحد سعيد.
ليلى: وبعدين؟
آمال: قعدوا يدوَّروا من هنا لهنا عشان يلاقوا واحد سعيد، أبدًا..
ليلى: وبعدين؟
آمال: وفين وفين، لقوا واحد راعي غنم، عجوز، وقاعد بيغني.
ليلى: وبعدين؟
آمال: قالوا له "يا راجل أنت، مبسوط؟"، قاللهم "أنا مبسوط وسعيد 24 قيراط"، قالوا له "طب فين قميصك"؟ بصوَّا التقوه ماعندوش قميص.
ليلى: وبعدين؟
آمال: خلاص! توتة توتة، فرغت الحدوته..
ليلى: أمال ليه كان مبسوط يا ماما؟
آمال: عشان كان عنده ناس يحبهم، وهما كمان يحبوه..

من فيلم نهر الحب
نوال: (لنفسها) وتمضي الساعات، لا يرى أحدنا، ولا يسمع، سوى صوت أنفاس الآخر، اللاهثة، بما يختلج في صدرينا.