من فيلم دعاء الكروان
الباشمهندس: ماتخليش الأموات يحكموا على الأحياء بالشقاء.. إنسي اللي فات وفكري في المستقبل.
آمنة: المستقبل مات يوم ما ماتت هنادي.
الباشمهندس: يعني مش قادرة تسامحيني..؟ إنتي حياتي يا آمنة.. فُراقك والموت واحد.. لو تسيبيني تبقي برضه ماعدلتيش عن الانتقام.
آمنة: آني بانتقم من نفسي؛ لأني خنت هنادي وخُنت نفسي.. فكرت في يوم من الأيام أعذبك بالحب.. وما جاش على بالي أن السلاح اللي حاولت أجرحك بي هايجرحني أنا كمان.. ماتفتكرش إني خارجة سليمة.
الباشمهندس: كنت أفضَّل نظرة الحقد اللي كانت في عنيكي وانتي جنبي، ولا الشعور بحبك وانتي بعيدة عني.

من فيلم ليلة القبض على فاطمة
فاطمة: معقول؟! معقول الدم يبقى مياة بالشكل ده؟!

من فيلم موعد مع الحياة
آمال: أحمد، اضحك.
أحمد: أنا اتعودت أضحك من قلبي.
آمال: خلي اللي في القلب في القلب، دي كل دقيقة بتفوت ماتتعوضش.. هي الدنيا إيه، غير ليلة وتعدي؟!
أحمد: آمال، تقول كده؟!
آمال: آمال عايشة في الدنيا..
أحمد: دنيتنا كانت جنة لاتنين.
آمال: الجنة من غير ناس، ما تنداس. وأجمل حاجة فيها حلم، وكاس.. دي ليالي العمر معدودة يا أحمد..

من فيلم دعاء الكروان
الباشمهندس: انت يا إما على نياتك أوي.. يا إما سِمَّاوية أوي.. اشربي..
آمنة: لا يا سيدي اعمل معروف!
الباشمهندس: بقولك اشربي.
آمنة: كفاية يا سيدي، أحسن أدوخ.
الباشمهندس: تدوخي.. ودي حاجة وحشة..؟! أنا كل يوم بشرب إزازة زي دي عشان أدوخ.. وانسى..
آمنة: تنسى ايه يا سيدي؟
الباشمهندس: أنسى نفسي.. أنا الانسان الوحيد اللي ما باحبش أقابله.. دايمًا متخاصمين.
آمنة: ليه؟
الباشمهندس: كل ماجي أحط راسي على المخدة: سين وجيم! ولوم!
آمنة: وليه اللوم؟ أنت بتعمل حاجة تغضب ربنا؟!
الباشمهندس: مش عن قصد.. أخطائي زي ما تقولي نوع من الهروب.. دي مسائل ما تفهميش فيها إنتي.. لكن هاكلمك عنها بردو بدل ماكلم نفسي..
آمنة: ساعات الواحد بيكلم الحيطة.. وبتهرب من إيه؟
الباشمهندس: م الوحدة.. في إيه في الريف غير الوحدة والملل؟ الأيام كلها زي بعضها.. في الصبح مرور على الجسور، وبالليل لعب الورق في النادي.. مع نفس الأصحاب.. همّا كمان الملل صابِبهم في قوالب.. عقولهم وقفت وأفكارهم اتجمدت.. زي اللي تكون مسجلة على اسطوانات.. يعيدوا النكتة الجديدة، ويضحكوا عليها من جديد.. ويكرروا الحكايات الوضيعة.. وتسليتهم الوحيدة: أن واحدة تروح، وواحدة تيجي.. تاخد دور البطولة في الحكاية الوضيعة..
آمنة: هنادي تروح وسكينة تيجي!

من فيلم دعاء الكروان
الباشمهندس: تعرفي أن فيكي حاجة من هنادي؟
آمنة: اشبه لها؟
الباشمهندس: في طبعها.. كانت نِفَرية زيك.. بس إنتي راسك ناشفة عنها.. هنادي داخت من أول كاس.. لكن إنتي باين عليكي تدوَّخي بلد..

من فيلم آثار في الرمال
راجية: أنا خايفة.
إبراهيم: خايفة من إيه؟
راجية: خايفة م المستقبل، وم الأيام..
إبراهيم: ليه بس يا راجية؟!
راجية: خايفة م المستقبل لأنه بعيد ومجهول.. وخايفة لأيَّامنا الحلوة دي تخلص.
إبراهيم: بالعكس.. دي أيَّامنا الحلوة لسة حاتبتدي.