من فيلم دعاء الكروان
آمنة: (مُحدثة الكروان) جيت؟ آني كنت مستنياك.. العمر بطوله وأنت في الجلب، وصوتك غالي في الودان.. صغيرة لجياك سعدي وفرحي.. كبيرة لجياك ونيس وسامع شكواي.. كنت وحديك معاي في الليلة المشئومة.. فاكر..؟ أنا وإنت استغاثنا، لكن صوتنا ضاع في الفضا الكبير.. دُعاك ما وصل لأي إنسان، وصرختي ما هزت جلب مخلوج..

من فيلم دعاء الكروان
الباشمهندس: مالك؟ أنا حسدتِك؟
آمنة: أبدًا.. أصلي سمعت الكروان.
الباشمهندس: واللي يسمع الكروان يكشر؟! ده بيقول "المُلك لك لك يا صاحب الملك".
آمنة: ساعات.. وساعات بيقول "أشكيه لك لك لك يا صاحب المُلك".
الباشمهندس: دانتي متبحرة أوي في لغة الطيور.. وبيقول كده على مين؟
آمنة: أنا عارفة بقى..! أهو كلام..
الباشمهندس: أنا عمري ما خدت بالي بيقول إيه.
آمنة: هتاخد بالك إمتى..؟ في الفجر بتكون رايح في النوم.. وبالليل مانتاش فاضي له..
الباشمهندس: وأنا صغير كنت باصحاله بدري، عشان أوقعه في الفخ.
آمنة: طول عمرك وانت آسي.
الباشمهندس: ما تبقيش عبيطة.. لما بيقع في الفخ بيبقى في إيدي.. بيبقى ملكي.. لكن ع الشجرة هاعمل بيه ايه؟
آمنة: ع الشجرة وهو حر هيسمعك صوته.. لكن وهو في إيدك أسير عمره ما هايصفالك.
الباشمهندس: إنتي هتخليني أندم.
آمنة: وهينفع بإيه الندم..؟
الباشمهندس: يارتني عرفتك من زمان، كنتي علمتيني الشفقة.
آمنة: اتعلم الشفقة من غيري.. آني جلبي بجى حجر.
الباشمهندس: إنتي؟! قلبك حجر؟! إيه اللي قسّاه؟
آمنة: واحد زيَّك، كانت غِيته ينصب الفخ.
الباشمهندس: قوليلي يا آمنة.. إنتي سبقلك حبيتي..
آمنة: كان ليّ أخت حبت، وجتلها الحب.
الباشمهندس: إزاي؟ احكيلي..
آمنة: ما جُلت لك وجعت في الفخ.. وعندنا اللي تفرط ملهاش إلا الموت.
الباشمهندس: واللي حبها عمل ايه؟ سابها تموت؟
آمنة: الصياد عُمره ما بيفكر في الطير اللي وجع.. كل همه في الصيد الجديد..
الباشمهندس: لكن هي غلطانة.. ماحافظتش‎ على نفسها.
آمنة: دايمًا العصفور هو اللي غلطان، والصياد ماعليهش لوم..!

من فيلم أفواه وأرانب
نعمت: بيت إيه بس اللي حاتلمني فيه يا سي يوسف؟! أنت بتقبض كام؟ مش 15 جنيه؟ هما دول يفتحوا بيت؟ دول ما يفتحوش سندرة يا سي يوسف.

من فيلم دعاء الكروان
الباشمهندس: إنتي سمعتي على حاجة اسمها "الخمرة"؟
آمنة: أيوة.. اللي بيسكروا بيها..
الباشمهندس: أنا بقى بالليل باخد كاسين.. وبعد ما بشرب، جتتي مبتبقاش خالصة.. ببقى واحد تاني..
آمنة: يبقى بقى العتب مش عليك.. ع الخمرة..
الباشمهندس: أهو كده.. ما قولنا بقى مفيش داعي تترعشي.. خافي مني بس بالليل..

من فيلم نهر الحب
خالد: ماتقوليش اسمك ولا عنوانك عشان أكون عند وعدي. صدفة تانية قريب.. بيقولوا ساعات، أن الدنيا صغيرة.
نوال: مش دنيتي أنا.

من فيلم دعاء الكروان
آمنة: بس هو من يوم ما رجع من مصر، وهو متغير.. بعد ما كان تحت رجليَّ حاسة أنه بيفلت مني..
زنوبة: نوّلتيه المراد..؟
آمنة: يا ندامة.. ولا خليته يلمس ضفري.
زنوبة: جدعة.. بس خدي بالك جوي.. الراجل من دول، إذا ما طلش المراد يزهج.. يطفش..
آمنة: أروحشي للشيخ وهدان يعمله عَمَل؟
زنوبة: العمل عملك إنتي.. اضربي ولاجي.. شدي وارخي..
آمنة: آني خايفة يا خالة زنوبة لا الغندورة بتاعة مصر تخطفه مني..
زنوبة: غندورة أيه؟
آمنة: اللي لطختله منديله بالهباب الأحمر!
زنوبة: شوفوا يا خواتي البت.. تكونيش غويتيه ومخبية عليّ؟!
آمنة: آني أحبه؟!
زنوبة: أمال مالك ملهوفة جوي عليه كده ليه؟!
آمنة: عشان مش عيزاه يِفِر من إيدي.
زنوبة: آآه.. حِليتلك اللعبة.. القطة المغمضة فتحت..
آمنة: هاعمل إيه يا خالة.. رسيني..
زنوبة: زَوِّديله الطُّعم شوية.. بس خلي بالك من نفسك؛ لا النار اللي عايزة تحرجيه بيها، تحرجك..