سعاد حسني

من فيلم الزوجة الثانية
عتمان: الكلام اللى بتقوله نظيرة صدق؟
فاطمة: ليه؟ لهو أنت مش دريان بنفسك!
عتمان: ماحصلش.
فاطمة: أهو حصل.
عتمان: من إمتى؟
فاطمة: إسأل نظيرة.
عتمان: مِن مين؟
فاطمة: من جوزي.
عتمان: جوزك؟!
فاطمة: يمين بالله العظيم جوزي.
عتمان: آني يا بِت؟!
فاطمة: طب هو أنت جوزي؟! آني مرات أبو العلا.
عتمان: يا فاجرة!
فاطمة: آني لو كنت فاجرة، كنت بقيت مراتك ولو لليلة واحدة.
عتمان: آني هاأدبحك!
فاطمة: وهاتقول للناس إيه؟ دبحتهِه عشان جابت لى الواد؟!
عتمان: مش ابني.
فاطمة: كَدِّبنى قدام أهل البلد. قولهم إن ده ابن أبو العلا وإن..
عتمان: إخرسي إخرسي. إنتي لازم تشوفيلك حَلْ في الواد ده!
فاطمة: أما تعلقلي حبل المشنقة.

من فيلم الكرنك
مسئول منظمة الشباب بالكلية: مالكومش دعوة أنتوا بالمسائل دي!
زينب: مالناش دعوة إزاي؟! إحنا كل المجهود اللي بنقوم بيه ده، على أساس أن لينا دعوة!
طالب 2: والرأي ده، من منطلق الحرص على المصلحة العامة.
مسئول منظمة الشباب بالكلية: خليكوا في شغلكوا أحسن، إحنا عارفين بنعمل إيه كويس! أنت، وإنتي، حصَّلوني ع المكتب.

من فيلم غريب.. في بيتي
عفاف لشحاتة: موت يا حمار.

من فيلم الكرنك
طالب 1: كل ده قماش؟ كل دي يُفَط؟
زينب: والكلام ده مين اللي حايقراه بس في "ميت معقول"؟
إسماعيل: الفلاحين طبعًا.
زينب: مش لما نعلمهم القراية الأول؟!
طالبة 1: طول ما هما عيانين، ومش واكلين، ومش لابسين، عمرهم ما حايتعلِّموا.
إسماعيل: على فكرة، اليُفَط دي حاتعمل أزمة قماش في البلد.
زينب: إيه رأيكم، بدل ما نكتب ع القماش ده، نفصَّلهُ جلاليب للفلاحين.

من فيلم غريب.. في بيتي
عفاف: بس يا كوثر بلاش السيرة دي إعملي معروف.
كوثر: خلاص، OK، hard luck.

من فيلم الزوجة الثانية
أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.