من فيلم الراقصة والسياسي
شفيق: مدام: إنتي عايزة إيه م الراجل ده بالظبط؟ ومن إمتى إحنا بنفتح الدفاتر القديمة؟!
سونيا: يا واد كنت فاكراك أذكى من كده! عايزة حاجات كتير.،.
شفيق: أعرفها لو سمحتي..
سونيا: باتسلى..
شفيق: دول مش بتوع تسالي!
سونيا: وحياتك أنت التسالي ما تحلوّ إلا مع دول..

من فيلم الراقصة والسياسي
عبد الحميد: ماقدرش أعمللك حاجة.
سونيا: ليه؟!
عبد الحميد: ماقدرش أتوسَّط لرقاصة!
سونيا: الله! إيه الحكاية، رقاصة، رقاصة! ماحنا الإتنين زي بعض يا عبد الحميد!
عبد الحميد: إنتي قليلة الأدب!
سونيا: وأنت كداب! علشان بتكدب على نفسك قبل ما تكدب على الناس! كل واحد فينا بيرقص بطريقته! أنا باهِز وسطي، وأنت بتلعَّب لسانك وتخطب!
عبد الحميد: الفرق شاسع يا عالمة، يا..
سونيا: .. أنا أقولك الفرق! إحنا الاتنين بنطلع في التليفيزيون.. أنا الناس بتتفرج عليَّ، وأنت أول ما بتظهر بتقفل التليفزيون! لأن رقصك مالوش جمهور، إنما أنا رقصي، له جمهور! عارف ليه؟
عبد الحميد: لأن بضاعتك رخيصة! هدفك تشعللي الغرايز المكبوتة عند الناس! إنتي شغلك الإثارة!
سونيا: اسم الله على مقامك الرفيع..! وأنت شغلك يبقى إيه؟! لما توعِد الناس بمستقبل مُشْرِق وييجي بكرة مايطلعلوش شمس!

من فيلم الراقصة والسياسي
سونيا: طب خُد، اطلبلي الأستاذ فتحي حبيب الصحفي.
شفيق: بس ده مش بتاع فن، ده بتاع سياسة.
سونيا: اسمع ونفذ!
شفيق: أوكيه.. فتحي حبيب، حرف الفيه.. أهه.. فوزي.. فـ.. ــ.. فور إم.. فتكات.. فُلة يا روحي! فتحي حبيب.

من فيلم الراقصة والسياسي
شفيق تِرتِر: (يدق على باب سونيا وهي تغير ملابسها).
سونيا: لسة شوية.
شفيق: أنا تِرتِر. (تفتح الباب ويدخل).

من فيلم الراقصة والسياسي
سونيا: عندي وصفة تخليك ماتعرقش وأنت بتلعب.. أنا شخصيًا ماشية عليها.. مفيش نقطة عرق بتنزل على جسمي وأنا بارقص..

من فيلم الراقصة والسياسي
الرائد: باقولك إيه؟ إذا كنتي بقى حضرتك خلصتي شغل، يا ريت تغيري هدومك عشان تيجي معانا!
سونيا: وأغير هدومي ليه؟! أنا أحب أفضل كده لابسة التٌهمة بتاعتي!