شفيق

من فيلم الراقصة والسياسي
سونيا: طب خُد، اطلبلي الأستاذ فتحي حبيب الصحفي.
شفيق: بس ده مش بتاع فن، ده بتاع سياسة.
سونيا: اسمع ونفذ!
شفيق: أوكيه.. فتحي حبيب، حرف الفيه.. أهه.. فوزي.. فـ.. ــ.. فور إم.. فتكات.. فُلة يا روحي! فتحي حبيب.

من فيلم الراقصة والسياسي
شفيق: مدام: إنتي عايزة إيه م الراجل ده بالظبط؟ ومن إمتى إحنا بنفتح الدفاتر القديمة؟!
سونيا: يا واد كنت فاكراك أذكى من كده! عايزة حاجات كتير.،.
شفيق: أعرفها لو سمحتي..
سونيا: باتسلى..
شفيق: دول مش بتوع تسالي!
سونيا: وحياتك أنت التسالي ما تحلوّ إلا مع دول..

من فيلم الراقصة والسياسي
سونيا: إحنا في زمن صعب وجو غريب يا شفيق.. ساعة سُخن، وساعة بارد.. لما تحصَّن نفسك بمسئول كبير، تبقى ضمنت في إيدك جهاز تكييف.. سُخن وبارد، ومُفتاحه في إيدك. فاهم؟
شفيق: فُله يا روحي.. أستاذة واللهي..

من فيلم الراقصة والسياسي
شفيق: أيوة.. من فضلك ماتحولِّناش أي مكالمات هنا في أوضة المدام، لو سمحت.. مهما كان الشخصية اللي بتتكلم.. اللي عايز يتطمن ع المدام، يبقى ييجي يزورها بنفسه، وإلا مش عايزينه!

من فيلم الراقصة والسياسي
شفيق: مدام.. بره فيه أكتر من ميت بوكيه ورد، ده غير اللي جوه في السويت.. خدي حضرتك اتسيلي في الكروت، واعرفي أصحابها بنفسك..
سونيا: إرميهم على الأرض يا شفيق.. ودوس عليهم برجليك.. إلا ما فيه حد فيهم فكَّر ييجي يطُل عليَّ.. فيهم الكداب، وفيهم اللي خايف على نفسه.. حتى اللي حبوني، مفيش حد فيهم قال الست دي قضيت معاها إيام حلوة.. لما أروح أطُل عليها.. دوس.. دوس عليهم برجليك.. مايستاهلوش..

من فيلم الراقصة والسياسي
سونيا: بافكر في المستقبل..
شفيق: ده هزار بقى! ده أنتي قاعدة ع القمة ومتربعة.. والكل بيجري عشان يِحَصَّلِك، وأنتي بسم الله ما شاء الله، دايمًا سابقة..
سونيا: الحقيقة حاجة تانية..
شفيق: دي الحقيقة اللي شايفاها كل الناس..
سونيا: الحقيقة اللي أنا شايفاها حاجة تانية خالص.. لما فكرت فيها كويس، عرفت قيمتها.. شفيق أنا ست مشهورة وعندي فلوس، بس! والمستقبل مش فلوس.. المستقبل أمان.. أنا عمري ما هانسى رميتي في المستشفى.. إلا ما حد كلِّف خاطره وجاه عشان يزورني.. علشان كده أنا لازم أعيد حِساباتي من تاني..
شفيق: كده ماشي الكلام.. بس المستقبل إن شاء الله، زي الفل.
سونيا: ماتبقاش أهبل.. المستقبل مش فلوس.. المستقبل ناس حواليك، تحبهم ويحبوك..

من فيلم الراقصة والسياسي
شفيق: سيادة الرائد؟ فيه حاجة؟
الرائد: لا لا لا، مفيش حاجة.
شفيق: نجيب قهوة.
الرائد: شكرًا.
شفيق: طب شوية شاي؟
الرائد: يا سيدي شكرًا!
شفيق: طب حاجة أصفرة!

من فيلم الراقصة والسياسي
شفيق تِرتِر: (يدق على باب سونيا وهي تغير ملابسها).
سونيا: لسة شوية.
شفيق: أنا تِرتِر. (تفتح الباب ويدخل).