من فيلم ليلة القبض على فاطمة
فاطمة لسيد: أنت اشتريت المال ورميتني!

من فيلم دعاء الكروان
هنادي: أنا ما مستبشرة خير.. الكلام اللي جالته ضرَّابة الودع ما يطمن.
آمنة: شاغلك كلام الرمَّالة..؟! هما بتوع الودع بيعرفوا شيّ.. هم كلمتين ليكي ولغيرك.. كل راجل بين حرمتين.. وكل حرمة بين راجلين.
هنادي: لكن أنا عارفة راجليني.. اللي حايئذيني خالي.. وعارفة اللي أذاني وبيريدني..
آمنة: ربنا ينتقم منه.
هنادي: ربنا يسامحه.
آمنة: طالبة السماح؟!
هنادي: ايوة.
آمنة: لسّاكي ريداه؟
هنادي: ما جادرة أكرهه.. الود ودي أكرهه وأنساه.
آمنة: بعد كل اللي جرى..؟! أني لو منك.. -.
هنادي: - لا تكملي يا آمنة.. هييجي يوم وتعرفي الحب.

من فيلم نهر الحب
خالد: ماتقوليش اسمك ولا عنوانك عشان أكون عند وعدي. صدفة تانية قريب.. بيقولوا ساعات، أن الدنيا صغيرة.
نوال: مش دنيتي أنا.

من فيلم دعاء الكروان
الباشمهندس: أوعدك إني مش هاضايقك بعد كده..
آمنة: سيبني أحسن أروح لحالي.
الباشمهندس: ثقي فيّ المرة دي.. وإذا حصل مني أي حاجة، قولي عليَّ قليل الأصل..
آمنة: وعلى إيه يا سيدي؟ أروح وتيجي غيري..
الباشمهندس: لا يا آمنة.. لو كنتي تتعوضي ماكنتش جيت وراكي.. أنا لو ماكنتش لحقتك كنت هافضل طول عمري ندمان على إني فرطت فيكي.. إرجعي يا آمنة..

من فيلم آثار في الرمال
راجية: أنا متهيألي إن أنا في حلم.
سنية: الأحلام لذيذة وحلوة، طول ما الواحد مغمَّض عينيه.
راجية: حاغمَّض، عشان أشوف الحاجة اللي أنا عايزة أعيش فيها. بكرة حاشوف اللي الدنيا حاترغمني إني أشوفه!

من فيلم ليلة القبض على فاطمة
فاطمة: أنت اللي عاوز إيه من السيد؟! راعبك في إيه السيد؟!
جلال: سيد ده إيه اللي يرعبني؟! ده جربوع! ده لا من مقامنا ولا يصَح يناسبنا!
فاطمة: سيد جربوع مش من مقامك يا بيه؟! ده كان عمك وخالك! الله ينعل أبو الزمن اللي خلَّاه مش من مقامك!