من فيلم دعاء الكروان
آمنة: بس هو من يوم ما رجع من مصر، وهو متغير.. بعد ما كان تحت رجليَّ حاسة أنه بيفلت مني..
زنوبة: نوّلتيه المراد..؟
آمنة: يا ندامة.. ولا خليته يلمس ضفري.
زنوبة: جدعة.. بس خدي بالك جوي.. الراجل من دول، إذا ما طلش المراد يزهج.. يطفش..
آمنة: أروحشي للشيخ وهدان يعمله عَمَل؟
زنوبة: العمل عملك إنتي.. اضربي ولاجي.. شدي وارخي..
آمنة: آني خايفة يا خالة زنوبة لا الغندورة بتاعة مصر تخطفه مني..
زنوبة: غندورة أيه؟
آمنة: اللي لطختله منديله بالهباب الأحمر!
زنوبة: شوفوا يا خواتي البت.. تكونيش غويتيه ومخبية عليّ؟!
آمنة: آني أحبه؟!
زنوبة: أمال مالك ملهوفة جوي عليه كده ليه؟!
آمنة: عشان مش عيزاه يِفِر من إيدي.
زنوبة: آآه.. حِليتلك اللعبة.. القطة المغمضة فتحت..
آمنة: هاعمل إيه يا خالة.. رسيني..
زنوبة: زَوِّديله الطُّعم شوية.. بس خلي بالك من نفسك؛ لا النار اللي عايزة تحرجيه بيها، تحرجك..

من فيلم موعد مع السعادة
إحسان: إسمع بقى يا آبا!
عم إبراهيم: ماسمعش حاجة.. إنتي متعلمة وعتجولي كلام يِمِس الجلب.

من فيلم دعاء الكروان
آمنة: (صوت) ما خطرلي في بال، إيه اللي مخبياه لينا الأيام..! يا ترى لو كنت رحت للمهندس كان صابني اللي صابها.. ولّا كل واحدة منّا حظها مسطّر على الجبين؟

من فيلم نهر الحب
نوال: أنت مابتزهقش أبدًا يا طاهر؟!
طاهر: من إيه؟
نوال: من أنك دايمًا معاك حق! من أنك مابتغلطش أبدًا؟! أنا لو مطرحك كنت أتمنى إني أغلط ولو مرة واحدة!
طاهر: يا عزيزتي نوال، الإنسان ممكن يغلط في حالة واحدة بس: لو فكَّر بقلبه.
نوال: يبقى عمرك ما حاتغلط أبدًا.

من فيلم موعد مع الحياة
آمال: (لنفسها) عذاب ساعة، ولا كل ساعة..

من فيلم لا أنام
نادية: هل مجرد التستر على الخطيئة، جريمة تستحق كل هذا العقاب؟