من فيلم آثار في الرمال
إبراهيم: راجية، بصيلي..
راجية: مش عايزة أفتَّح عينيَّ.. متهيَّألي إن باحلم، وخايفة أصحى لا يروح الحلم الجميل اللي أنا فيه.
إبراهيم: الحلم الجميل اللي أنتي فيه حايفضل على طول، مش حاينتهي أبدًا.. راجية، قولي إنك بتحبيني..
راجية: لأ مش حاقول! لأن اللي عندي ده مش حب، أكتر من حب.. الواحد لما يحب حاجة، تكون غريبة عنه.. لكن أنت في دمي.. في كياني.. فهِمت أنت إيه بالنسبة لي؟
إبراهيم: أنا كمان حاسس إني ماقدرش أستغنى عنك.. حاسس أن حياتي مُستمدة منك.. من غيرك ماقدرش أعيش أبدًا..

من فيلم موعد مع السعادة
ممدوح: فهمت أن الإنسان اللي يعيش لنفسه، يعيش لوحده.. وان اللي يعيش لوحده، عمره ما يعرف معنى السعادة.

من فيلم موعد مع السعادة
ممدوح: إيه؟ مش حاتبوسيني هنا بقى؟
ليلى: (تقبله في خده وهي تقول مع كل قبلة) كاك.. كاك.. كاك..
ممدوح: كاك؟!
ليلى: البطة بتقول كده يعني، يعني "باحبك أوي أوي أوي أوي"..

من فيلم آثار في الرمال
راجية: أنا خايفة.
إبراهيم: خايفة من إيه؟
راجية: خايفة م المستقبل، وم الأيام..
إبراهيم: ليه بس يا راجية؟!
راجية: خايفة م المستقبل لأنه بعيد ومجهول.. وخايفة لأيَّامنا الحلوة دي تخلص.
إبراهيم: بالعكس.. دي أيَّامنا الحلوة لسة حاتبتدي.

من فيلم آثار في الرمال
راجية: رسمت صورتك.
إبراهيم: صحيح؟
راجية: أيوة.
إبراهيم: ورسمتيني من الذاكرة؟
راجية: طبعًا م الذاكرة، ماتعرفش أنك مُقيم فيها؟

من فيلم المرأة المجهولة
فاطمة: أنا في الحقيقة يا دكتور أحمد.. كان لازم أقول لك.. يعني.. مكسوفة من نفسي.. و.. ومن..
أحمد: مكسوفة إنك خرجتي معايا؟! يا ستي الدنيا اتغيرت.. إحنا دلوقتي سنة تلاتين!