من فيلم طيور الظلام
فتحي نوفل: الفرصة دي مش على مقاسي.. حَكِم الفرص زي الجِزَم.. لا تبقى ضيقة قوي تخليك تعرج، ولا تبقى واسعة وتخليك تِلُقّ.
علي: أيوه بس إنت كده بتدِّي ضهرك لمستقبل مضمون.
فتحي نوفل: فرصتك مالهاش مستقبل يا علي.. هاتاخد فلوس آه.. هاتاخد شهرة آه.. لكن إوعى تنسى إنك هاتكون ضد الدولة.
علي: وليه ماتقلش من الثائرين؟
فتحي نوفل: (ضاحكًا) ثائرين إيه يا علي إحنا حانهزر؟ إنت لسه قايلِّي بعضمة لسانك إن المسألة مصالح!

من فيلم اللعب مع الكبار
زوج المرأة في السينما: يا أستاذ.
حسن: نعم؟
الرجل: المدام.
حسن: مدام مين؟
الرجل: المدام بتاعتي!
حسن: مالها المدام بتاعتك؟
الرجل: أنت قاعد عليها!

من فيلم لصوص لكن ظرفاء
شوشو: أنا فنجاني مايذكبشي أبدًا، وحلمي مايقعش الأرض.
إسماعيل: حلمي؟!

من فيلم طيور الظلام
فتحي نوفل: البلد دي اللي يشوفها من فوق، غير الل يشوفها من تحت.

من فيلم النوم في العسل
إلهام: معلش يا حبيبي.. يمكن تكون تعبان م الشغل..
مجدي: شغل إيه؟! مانا طول عمري باشتغل.. لا لا لا لا.. الشغل مالوش دعوة..
إلهام: طب إيه رأيك؟ نلعب شوية، نهزر شوية..؟
مجدي: يا نهار أزرق! حتى إنتي؟! ماحنا بقالنا ساعتين بنهزر وبنلعب! لا لا لا لا.. لا حول ولا قوة إلا بالله.. لا حول ولا قوة إلا بالله..
إلهام: خلاص! خلاص يا مجدي مفيش مشكلة.. إن ماكانتش النهاردة يبقى بكرة..
مجدي: هو أنا بقى يتقاللي الكلام ده؟!

من فيلم اللعب مع الكبار
علي: مالك يا حسن؟
حسن: أنا حسن بهنسي بهلول، أنا المسكين في هذا الزمان، أنا المُحاط بالأوهام. أنا الذي إذا جاع نام، أنا المخدوع بالكلام! أنا اتسرقت يا علي! اتسرقت يا علي! اتسرقت!
علي: اتسرقنا بكل الأشكال يا حسن.
حسن: كويس أن أبو الهول والأهرام لسة ماتسرقوش.
علي: عشان دي حجارة يا حسن!
حسن: هو لازم كل حاجة في بلادنا تبقى حجارة عشان ماتتسرقش يا علي؟! حتى الحب وروحه الحلوة اتسرقوا يا علي! وآخرتها يا علي؟! آخرتها إيه يا علي؟!