من فيلم النوم في العسل
مجدي: ولّا أنت كمان فاكر حاجة! أنت فاكر حاجة؟!
همام: لا يا باشا.
مجدي: سوق! إوعى تكون فاكر حاجة!

من فيلم مراتي مدير عام
أبو المجد: استنى يا حضرة الوكيل، استنى!
عبد القوي: إيه يا أبو المجد، فيه إيه؟
أبو المجد: شاكك.. شاكك.. إن ده لحم خنزير!
عبد القوي: إيه؟! ده مخ!
أبو المجد: مخ خنزير!
عبد القوي: وعلى إيه؟! مادام فيها شك يغنيها ربونا.. مش ضروري.. وده إيه راخر؟!
أبو المجد: عصير خنزير راخر.

من فيلم حنفي الأبهة
حنفي الأبهة: بعد كده، أبص في شفايفها.. عشان تسقيني من حنانها.. إسقيني.. بالظبط هي كانت بتبرَّق كده برضه.

من فيلم اللعب مع الكبار
حسن: المصدر بتاعي ماينفعش يبقى دليل في أي قضية، يبقى دليل براءة، مش دليل إدانة!
معتصم: قصدك إيه يعني؟
حسن: يعني اللي سمعته! أنا المصدر بتاعي يبوَّظ أي قضية! هي دي المصيبة! هي دي المصيبة! في حالات كتير بيكون الالتزام بالقانون في صالح المجرم! كام جريمة رشوة خدت براءة لخطأ في الإجراءات؟! (يتوجَّه لمنظف القمامة) قول له! كام قضية مخدرات خدت براءة عشان هفوة بسيطة في محضر الضبط! وكام وكام وكام وكام؟! (ينظر لتمثال طلعت حرب) قول له يا عم طلعت! قول له! سيادة المقدم أنا المصدر بتاعي لا يمكن يكون مفيد ليك، ولا للمحكمة. أنا المصدر بتاعي حلم!
معتصم: يبقى تسمع نصيحتي.
حسن: أسمع، ماسمعش ليه؟!
معتصم: لعبتك أنت والمصدر بتاعك، مالهاش أي لازمة.
حسن: اعتبرها تسالي. تسالي!
معتصم: ماحدش يدخل قفص الأسود، ويقول ألعب معاهم شوية!
حسن: معنى كده إن أنا أرضى بالأمر الواقع!
معتصم: لأ، إرضى بالقانون بسلبياته، وفكَّر، إن كان مصدر غير قانوني، إحنا ممكن نشوف له شكل قانوني، عشان تبقى الحكاية صح.
حسن: اسأل من رجال القانون كيف نجعل من الحلم سند قانوني، يُقْبَل أمام المحاكم، ولا يُخالف نص الدستور.

من فيلم زهايمر
محمود: وإيه الصورة دي بقى؟
منى: دي لما خدت بطولة الجمهورية.
محمود: في إيه؟
منى: في الملاكمة.
محمود: في الملاكمة، آه! وأنا غلبت ده؟!
منى: بالقاضية.
محمود: وهو عارف أن أنا غلبته؟!

من فيلم مراتي مدير عام
أبو المجد: إزاي بقى يبقى "الرِّجَالُ قَوَّامُونَ عَلَى النِّسَاء"، إذا كان اللي بيدي الأوامر.. واحد نساء؟!