عبد الحميد

من فيلم الراقصة والسياسي
عبد الحميد: مايبقاش وشك مكشوف أوي كده!
سونيا: وأغطي وشِّي ليه وأنا كاشفة رجليَّ على طول؟!

من فيلم الراقصة والسياسي
عبد الحميد: سونيا لازم تقدَّري موقفي كرجل سياسي معروف، الناس بتحاسبه على كل كبيرة وصغيرة.. قعدتك معايا فيها إحراج ليَّ.
سونيا: أنت ممنوع تقعد مع ستات؟
عبد الحميد: بمعنى أصح: رقَّاصات! الناس هنا عارفة كويس إنك رقَّاصة.
سونيا: بس المفروض إني من رعاياك يا مولاي.. ولّا حضرتك مسئول عن ناس، وناس لأ؟! مفروض أنك بتخدم شعب بحاله.. العِدِل فيه، والأعوج.. وبعدين لما فيه ناس مش على هواكم وجايبالكم العار زي حلاتي، بتسمحولهم ليه ينتخبوكوا؟! ما كفاية عليكوا أوي الأصوات التانية!

من فيلم الراقصة والسياسي
عبد الحميد: ماقدرش أعمللك حاجة.
سونيا: ليه؟!
عبد الحميد: ماقدرش أتوسَّط لرقاصة!
سونيا: الله! إيه الحكاية، رقاصة، رقاصة! ماحنا الإتنين زي بعض يا عبد الحميد!
عبد الحميد: إنتي قليلة الأدب!
سونيا: وأنت كداب! علشان بتكدب على نفسك قبل ما تكدب على الناس! كل واحد فينا بيرقص بطريقته! أنا باهِز وسطي، وأنت بتلعَّب لسانك وتخطب!
عبد الحميد: الفرق شاسع يا عالمة، يا..
سونيا: .. أنا أقولك الفرق! إحنا الاتنين بنطلع في التليفيزيون.. أنا الناس بتتفرج عليَّ، وأنت أول ما بتظهر بتقفل التليفزيون! لأن رقصك مالوش جمهور، إنما أنا رقصي، له جمهور! عارف ليه؟
عبد الحميد: لأن بضاعتك رخيصة! هدفك تشعللي الغرايز المكبوتة عند الناس! إنتي شغلك الإثارة!
سونيا: اسم الله على مقامك الرفيع..! وأنت شغلك يبقى إيه؟! لما توعِد الناس بمستقبل مُشْرِق وييجي بكرة مايطلعلوش شمس!

من فيلم الراقصة والسياسي
عبد الحميد: عارف لما خَدَّامة صحتها كويسة تِسْتَفْرَد بسجادة بلكونة؟
برهان: عارف يا فندم.
عبد الحميد: أهو أنا بقى كنت السجادة!

من فيلم الراقصة والسياسي
سونيا: مقابلة مُريبة.. زي مهربين المخدرات بالظبط.. جايين نبدل الشنط!
عبد الحميد: العِند دايمًا آخرته الخسارة يا.. سونيا..
سونيا: أنا ماعنديش حاجة عشان أخسرها يا عبد الحميد بيه.. طلعت، نزلت، رقاصة من بتوع الهشيك بيشيك..

من فيلم الراقصة والسياسي
عبد الحميد: خلاص.. بعد الانتخابات أوعدك خير..
سونيا: هه هه.. بعد الانتخابات؟! ده أنت هاتديني بالجزمة!
عبد الحميد: لأ، أوعدك أن المشروع هايمشي.
سونيا: في دي ماقدرش أصدقك يا "خالد بك مدكور"! أنا رقَّاصة.. وفي شغلنا، بنقبض مقدم.. بعد الفُرجة ماحدش بيعبَّرنا!

من فيلم الراقصة والسياسي
عبد الحميد: إحنا كده في طريق مسدود!
سونيا: بالعكس! ده احنا كده في طريق مفتوح م الناحيتين.. كده رايح.. وكده جاي..