من فيلم دعاء الكروان
هنادي: بت يامنة، أوعي تزلفي بكلمة جدام أماي.
آمنة: إنتي فكراني صغيرة..؟! دنا أوعى منكِ!

من فيلم سر طاقية الإخفاء
آمال: هي أي واحدة تتجوز واحد مابتحبوش، تبقى ارتكبت أكبر جريمة في حق نفسها.
والدة آمال: وإيه يعني؟! مانا ارتكبت أكبر جريمة واتجوزت أبوكي!

من فيلم سر طاقية الإخفاء
آمال: تقدر تقول لي، إيه العمايل اللي حصلت تحت في الشارع؟
عصفور: آه! دي ضريبة المهنة يا حياتي. زي اللي مرشَّخ نفسه في الانتخابات: إيديَّ تتملَّخ م السلامات، أشرب القهوة وأنا قرفان م اللي بيقدمها، أنباس وأنا بانضرب في جنبي بالرصاص!

من فيلم دعاء الكروان
آمنة: مُنايا أوديكي بيت المأمور عشان أفرجك على حاجة عمرك ما شوفتيها ولا هتشوفيها.
هنادي: هي ايه؟
آمنة: مكنة كده اسمها البيانا (piano)؛ سودا وليها صوابع بيضا.. أول الست ما تلمسها تقولي ساكنها جان..؟! تسمعي كروانات الدنيا كلتها، وطبل إيه ومزازيك إيه..

من فيلم الرباط المقدس
والدة حسني: مش شايف مراتك عاملة في شعرها إيه؟!
سعاد: أأ.. دي سميحة هي اللي عاملاهولي عندها في البيت.
والدة حسني: وليه؟! مش بعيد تكوني طلعتي فيها وبتروحي للمزيِّن!

من فيلم إسماعيل يس في البوليس
سنية: معلش.. اعمل طيِّب وارميه البحر.
زكي: هو البحر مفيش مرة يحط في عينة حصوة ملح، ويرميلنا هو شوية طيِّب من عنده؟!