شكري سرحان

من فيلم الزوجة الثانية
أبو العلا: إيه الكلام ده يا عمدة؟
عتمان: ده مش كلام يا أبو العلا.. ده أمر!
أبو العلا: في شرع مين؟!
مبروك: "وأطيعوا الله وأطيعوا الرسول وأولي الأمر منكم".
أبو العلا: آني أطلق مرتي!! ليه؟!

من فيلم السفيرة عزيزة
أحمد: أنا كمان لو رجعت في يوم م الأيام ومالقيتش الأكل جاهز..
عزيزة: يا مصيبتي! وده معقول؟!
أحمد: تعرفي حاعمل إيه؟ حامسكك من إيدك، وأسحبك في المطبخ، وأقفل الباب بالمفتاح، وأمسك السكينة، وأقرَّب عليكي وأقولِّك: "هاتي البطاطس يا عزيزة".

من فيلم موعد مع الحياة
آمال: أحمد، اضحك.
أحمد: أنا اتعودت أضحك من قلبي.
آمال: خلي اللي في القلب في القلب، دي كل دقيقة بتفوت ماتتعوضش.. هي الدنيا إيه، غير ليلة وتعدي؟!
أحمد: آمال، تقول كده؟!
آمال: آمال عايشة في الدنيا..
أحمد: دنيتنا كانت جنة لاتنين.
آمال: الجنة من غير ناس، ما تنداس. وأجمل حاجة فيها حلم، وكاس.. دي ليالي العمر معدودة يا أحمد..

من فيلم موعد مع الحياة
آمال: (عن وردة) يا خسارة.. حاتدبل بسرعة.. يمكن عشان كده بنحبها..
أحمد: ويمكن ده سر جمالها.
آمال: صحيح، الواحد مش لازم يطلب م الوردة أنها تكون أكتر من وردة، تتولد في ليلة، وتعيش يوم.

من فيلم شباب امرأة
إمام: أصل المذاكرة.. وأنت عارف بجى!
حسبو: أيوة أنا واخد بالي أنك مِتَّك على روحك أوي في المذاكرة!
إمام: أصل المذاكرة كلها سهر، و.. وتعب.. و..
حسبو: عارفها، عارفها.. ياما ذاكرت أنا راخَر قبل منك.

من فيلم الزوجة الثانية
أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.