من فيلم الزوجة الثانية
عتمان: إيه ده؟!
حفيظة: إيه ده؟!
عتمان: وزة... وزة يا وليه؟! إنتى اتهبلتي؟!
حفيظة: والله ما اتهبل إلا أنت.. كنت قُلت لك نفسي في البط؟!
عتمان: وأنا كنت قُلت لك نفسي في الوز؟!
حفيظة: آه.
عتمان: وزة وبطة! اللهم إنى لا أسألك رد القضاء.. النهاية. عليه العوض ومِنه العوض. حَوِّشي الكبدة، وحَمَّرى الدَّكر لوحده.
خفير: يحمض يا عمدة.
عتمان: حمضت معدتك.. اسمع يا وله، بعد ما يتحمَّر الدكر تاخده توديه لحضرة ظابط النقطة وتقول له حضرة العمدة دابحهولك خصوصي.. فاهم؟ خصوصي.

من فيلم الزوجة الثانية
عتمان: الكلام اللى بتقوله نظيرة صدق؟
فاطمة: ليه؟ لهو أنت مش دريان بنفسك!
عتمان: ماحصلش.
فاطمة: أهو حصل.
عتمان: من إمتى؟
فاطمة: إسأل نظيرة.
عتمان: مِن مين؟
فاطمة: من جوزي.
عتمان: جوزك؟!
فاطمة: يمين بالله العظيم جوزي.
عتمان: آني يا بِت؟!
فاطمة: طب هو أنت جوزي؟! آني مرات أبو العلا.
عتمان: يا فاجرة!
فاطمة: آني لو كنت فاجرة، كنت بقيت مراتك ولو لليلة واحدة.
عتمان: آني هاأدبحك!
فاطمة: وهاتقول للناس إيه؟ دبحتهِه عشان جابت لى الواد؟!
عتمان: مش ابني.
فاطمة: كَدِّبنى قدام أهل البلد. قولهم إن ده ابن أبو العلا وإن..
عتمان: إخرسي إخرسي. إنتي لازم تشوفيلك حَلْ في الواد ده!
فاطمة: أما تعلقلي حبل المشنقة.

من فيلم العصفور
اللواء إسماعيل: وأنت فلاحتك دي حاتوصلك إليه؟!
يوسف: الحقيقة. أظن كده.
اللواء إسماعيل: للسجن تاني!
يوسف: على العموم الحقيقة لازم يكون لها تمن.

من فيلم العصفور
عسكري: لا موآخذة، عندي أوامر أنك ماتنزلش!
اللواء إسماعيل: من مصلحتك يا يوسف أفضَّل تعتبر نفسك تحت الرقابة!
يوسف: بأي حق؟!
اللواء إسماعيل: المصلحة العامة.

من فيلم الزوجة الثانية
مبروك: صاحبك مفروس. ربنا وكسه.
عتمان:  أيوه. وكسه ونصفني!
مبروك: ولسه.
عتمان: لسه؟ لسه فيه إيه تاني؟! كده حلو. حلو قوى.
مبروك: الوصفة دى تستعملها على طول. لحسة ع الريق ولحسة قبل النوم. لأجل ماتنيها بولد تاني.
عتمان: تاني؟!
مبروك: وتالت ورابع. آني مش قلتلك إنت صاغ سليم. براوة يا فاطمة.
عتمان: إيوة! براوة. رفعت راسي وِطَوِّلِت رقبتي.

من فيلم الزوجة الثانية
أبو العلا: إيه الكلام ده يا عمدة؟
عتمان: ده مش كلام يا أبو العلا.. ده أمر!
أبو العلا: في شرع مين؟!
مبروك: "وأطيعوا الله وأطيعوا الرسول وأولي الأمر منكم".
أبو العلا: آني أطلق مرتي!! ليه؟!