من فيلم خرج ولم يَعُد
كمال: زمان.. كنت غاوي عربيات.
عطية: (يشير للعربة التي يستقلها كمال) حضرتك غاوي عربيات زمان.

من فيلم الكرنك
دياب لزينب: (عن أمه) قالتلي: "إوعى تنقهر.. حكم البني آدم لما ينقهر، يتسلي زي الدبيحة في الأزان".

من فيلم الكرنك
حسب الله: مع السلامة يا معلم دياب.. حاتوحشنا مناكفتك..
دياب: أما أنت صحيح راجل ندل.
حسب الله: والحسين أنت راجل ناقص،.

من فيلم الكرنك
دياب: قال نص ساعة قال! (حيث أخبره عادل "زائر الفجر 2" أن زينب ستقضي عندهم نصف ساعة فقط منذ أيام).

من فيلم خرج ولم يَعُد
سنية: أمال حاتدفع منين لعطية العربون؟
كمال: تتدبَّر.

من فيلم خرج ولم يَعُد
كمال: أنا عرفت من الحاج عوضين أنك واخد أجازة شهرين.. مصالح إيه بقى اللي وراك؟!
عطية: أنا مش واخد على عيشة الأرياف.. طول عمري واخد على عيشة القاهرة..
كمال: باردون يا أستاذ عطية، أنا مش قصدي أهينك.. أنا لما كنت في سنك كده كنت عايش في لندن وباريس ونيويورك.. صدقني.. مارتحتش غير هنا، في العزيزية.
عطية: جايز.. بس كل إنسان له طبعه..
كمال: أنا لما آخد عليك حابقى أحكيلك تاريخ حياتي. بس عايزوك تنسى حكاية نزولك مصر.
عطية: هو حضرتك محتاجني هنا في حاجة؟
كمال: أنا هنا مش ناقصني حاجة أبدًا.. إنما أحيانًا أحتاج لإنسان، ياكل معايا، أتكلم معاه.. إنسان تاني غير مراتي وبناتي.. راجل زيي زيه.. فهمت..؟
عطية: الحقيقة مش أوي!
كمال: آه.. بكرة لما تبقى في سني حاتفهم كل حاجة.. أنا كل اللي باطلبه منك تقعد معانا هنا يومين تلاتة.. دي خدمة مش حانسهالك طول عمري..
عطية: بس أنا لا باعرف أقول نُكت، ولا أحكي حكايات!
كمال: أنا مش طالِب منك تمثل لي دور "شهرزاد"! أنا عاوزك تفتحلي قلبك.. وأفتحلك قلبي..