من فيلم الكرنك
والدة زينب: كبدي عليكي يا بنتي.
دياب: كبدها قال! وفشتها وطحالها! ده تُقل يا ولية! حَبِّبة آخر زمن.

من فيلم الكرنك
دياب: يعني الأرض انشقت وبلعتهم؟!
مسئول مديرية الأمن: مديرية الأمن ماعندهاش أي خبر عن الموضوع ده.
دياب: أمال نسأل فين؟! في مديرية التحرير، ولّا استعلامات السكة الحديد؟!

من فيلم خرج ولم يَعُد
كمال: الأكل ده نعمة من نعم ربنا.. لذة من لذائذ الحياة الكُبرى..
عطية: أنا مش عارف الحقيقة دي كانت غايبة عني إزاي!
كمال: مش مهم تاكل غالي أو رخيص.. المهم أنك تتمتَّع بالأكل.. أنا، مستعد أعمل لك طبق فوق مدمس، أطعم وألذ من ديك رومي.

من فيلم خرج ولم يَعُد
كمال: أنا عرفت من الحاج عوضين أنك واخد أجازة شهرين.. مصالح إيه بقى اللي وراك؟!
عطية: أنا مش واخد على عيشة الأرياف.. طول عمري واخد على عيشة القاهرة..
كمال: باردون يا أستاذ عطية، أنا مش قصدي أهينك.. أنا لما كنت في سنك كده كنت عايش في لندن وباريس ونيويورك.. صدقني.. مارتحتش غير هنا، في العزيزية.
عطية: جايز.. بس كل إنسان له طبعه..
كمال: أنا لما آخد عليك حابقى أحكيلك تاريخ حياتي. بس عايزوك تنسى حكاية نزولك مصر.
عطية: هو حضرتك محتاجني هنا في حاجة؟
كمال: أنا هنا مش ناقصني حاجة أبدًا.. إنما أحيانًا أحتاج لإنسان، ياكل معايا، أتكلم معاه.. إنسان تاني غير مراتي وبناتي.. راجل زيي زيه.. فهمت..؟
عطية: الحقيقة مش أوي!
كمال: آه.. بكرة لما تبقى في سني حاتفهم كل حاجة.. أنا كل اللي باطلبه منك تقعد معانا هنا يومين تلاتة.. دي خدمة مش حانسهالك طول عمري..
عطية: بس أنا لا باعرف أقول نُكت، ولا أحكي حكايات!
كمال: أنا مش طالِب منك تمثل لي دور "شهرزاد"! أنا عاوزك تفتحلي قلبك.. وأفتحلك قلبي..

من فيلم قضية عم أحمد
عم أحمد: شغَّلوا مخكم..! ماهو أنت يابني لما تنام، وغيرك ينام، البلد حاتنام! ولّا فالحين بس تشتروا حاجات مستوردة! ده أناناس، وده شامبو بالبيض، وده شامبو بالبسطرمة. إصحوا! اصحوا! الشمس طلعت وأنتوا لسة نايمين تحت اللحاف!

من فيلم خرج ولم يَعُد
كمال: زمان.. كنت غاوي عربيات.
عطية: (يشير للعربة التي يستقلها كمال) حضرتك غاوي عربيات زمان.