فيلم الزوجة الثانية

Al-Zouga Al-Thaneya

حفيظة: إتحشم يا أهبل يا أبو ريالة! إخص عليك راجل خيخة! (تبصق).

عتمان: الكلام اللى بتقوله نظيرة صدق؟
فاطمة: ليه؟ لهو أنت مش دريان بنفسك!
عتمان: ماحصلش.
فاطمة: أهو حصل.
عتمان: من إمتى؟
فاطمة: إسأل نظيرة.
عتمان: مِن مين؟
فاطمة: من جوزي.
عتمان: جوزك؟!
فاطمة: يمين بالله العظيم جوزي.
عتمان: آني يا بِت؟!
فاطمة: طب هو أنت جوزي؟! آني مرات أبو العلا.
عتمان: يا فاجرة!
فاطمة: آني لو كنت فاجرة، كنت بقيت مراتك ولو لليلة واحدة.
عتمان: آني هاأدبحك!
فاطمة: وهاتقول للناس إيه؟ دبحتهِه عشان جابت لى الواد؟!
عتمان: مش ابني.
فاطمة: كَدِّبنى قدام أهل البلد. قولهم إن ده ابن أبو العلا وإن..
عتمان: إخرسي إخرسي. إنتي لازم تشوفيلك حَلْ في الواد ده!
فاطمة: أما تعلقلي حبل المشنقة.

أم لوزة: جاموستي يا عمدة. آني سايقة عليك النبي ترجع لى جاموستي.

مبروك: صاحبك مفروس. ربنا وكسه.
عتمان:  أيوه. وكسه ونصفني!
مبروك: ولسه.
عتمان: لسه؟ لسه فيه إيه تاني؟! كده حلو. حلو قوى.
مبروك: الوصفة دى تستعملها على طول. لحسة ع الريق ولحسة قبل النوم. لأجل ماتنيها بولد تاني.
عتمان: تاني؟!
مبروك: وتالت ورابع. آني مش قلتلك إنت صاغ سليم. براوة يا فاطمة.
عتمان: إيوة! براوة. رفعت راسي وِطَوِّلِت رقبتي.

حسان: إلهى يعمر بيتك يا فاطمة يا بنت ستيتة.
فاطمة: اتفضلوا بالهنا والشفا.
فلاح 1: دى رَجَّعِت لأم لوزة جاموستها.
فلاح 2: ولما راحلها عوض الأعرج قالت له روح ازرع أرضك ولا يهمك.
فلاح 3: ده شُغْل ربنا يا عم.. بيسلَّط أبدان على أبدان.

مبروك: الله يرحمه ويسامحه.
فلاح: الله يجحمه!
فلاح 1: أذكروا محاسن موتاكم!
فلاح 2: هو عمره عمل حاجة لله؟!

خفير: يا سلام على حكمة ربنا.
خفير 2: مانابوش من الـ500 فدان غير حتة أرض مِتْر في متر!

صوت المعلق: دُنيا وفيها كل إشي. وكل مِنْ جاها مشي.. وكل ظالم إنخسف.. والحق هو اللى اتنصف.. وتوتة توتة، فرغت الحدوتة.