من فيلم حدوتة مصرية
عبد الهادي: أهو الناس تتسلى.
يحيى: أنا مش مسلواتي. روح شوف أراجوز تفهمه!
نبقة: ما أنت راخَر معلَّق على الجلاليب وناس حافية! يا أخي إعمل لك فيلم فيه فخفخة شوية.
يحيى: أبيع أحلام زي الأمريكان؟!
نبقة: وماله؟! على الأقل ننسى الهم اللي إحنا فيه.
يحيى: ويفضل راكِبنا!

من فيلم العصفور
فاطمة: باين عليك التعب..
رؤوف: إنتي اللي تعبتي..
فاطمة: يعني..
رؤوف: يعني إيه؟
فاطمة: يعني اتعدينا من بعض.. بتضحك ليه؟
رؤوف: خايف يكون الحب زي الزُكام: مُعدي. تقولي شِعر!
فاطمة: ماتخافش، قول. الشعر اللي مكتوم جوَّاك ده، يمكن هو اللي ملوِّن عينيك دايمًا بلون حزين. الحُزن ساعات، أجمل ميت مرة من الفرح.

من فيلم المصير
أبو يحيى: الأفكار لها أجنحة، ماحدش يقدر يمنعها توصل للناس.

من فيلم الاختيار
رؤوف: أهم شيء في الدنيا، أن الواحد مايضحكش على نفسه.

من فيلم حدوتة مصرية
عبد الهادي: عصفور إيه؟! وطرطور إيه؟!
أحد أعضاء لجنة الرقابة: ماتشوفلك قصة تانية.
يحيى: ده أهم فيلم في حياتي.
أحد أعضاء لجنة الرقابة: على كل حال، سيادتك تاخد ده وتشوفلك طريقة فيه.
يحيى: هي دي الطريقة! ده شغل سنتين.
عبد الهادي: لا بقى! ماتتعالاش أوي ع اللجنة. هو أنت عايز تكتب على كيفك؟!
يحيى: أمال أكتب على كيفك أنت؟! أكتب أفكارك أنت؟! طبعًا لازم أكتب من خلال مخي أنا. إذا كان نفسك تكتب حاجة اتفضل اكتبها، ورد ع الأفكار اللي مش عاجباك، مش تكتمها!
عبد الهادي: بدل ما تحاول تكشف بلاوي التانيين، شوف بلاويك أنت. لو كتبت أنا، حضرتك تسيب البلد وتجري.