من فيلم ليلة ساخنة
حورية: ابنك؟
سيد: بلوتي!
حورية: حرام عليك.. ده زي العسل.. إزيَّك يا حبيبي.. الله الله الله الله.. طب رُد السلام.. ابنك تقيل أوي يا باشمهندس..
سيد: في الأول بس.. لو خد عليكي، هاتقولي حقي برقبتي.

من فيلم الآخر
بهية: معلش، أنا كنت طلعت حمارة وقليلة الأدب، لكن باحبك.

من فيلم ليلة ساخنة
حورية: طب امسك.. خلِّي ده معاك رهن. لو ما دفعوش، حلال عليك..
سيد: البسي الخاتم! مش أنا اللي يقلَّع واحدة ست صيغتها..

من فيلم ليلة ساخنة
حورية: ماتِقساش عليها.. إنت بتاكل منها عيش.
سيد: إكمن عربيتهم ماضية يعني؟! ماتخافيش.. المهم السوَّاق مش العجل.

من فيلم ليلة ساخنة
سيد: سبحان الله!
حورية: مهيَّصين على إيه بس؟! بيجيبوا راحة البال منين؟!
سيد: حد لاقي دلع ومايتدلعش؟! صباح الخير، اغرفي.. مساء الخير، سَقِّي!
حورية: ياعيني علينا!
سيد: إللي زينا، ينزل يشتغل ويطلع عين اللي خلِّفوه على ما يجيب الجنيه!
حورية: وياريته بيروَّح بيه!

من فيلم ليلة ساخنة
حورية: وهو الولد كده يا قلبي؟!
سيد: حكمة ربنا..
حورية: مالوش علاج؟
سيد: بيقولوا فيه مراكز في أمريكا وفي أوروبا، بيعملولهم تدريبات وعلاج نفسي.. بس مين يقدر عليها.. كل برغوت على أد دَمّه.. بس أنا مدخله مدرسة، ربنا يقدرني على مصاريفها..
حورية: ده نعمة.. عَيِّل زي ده يباركلك في بيتك وعافيتك.. وتخش الجنة على إيده..
سيد: أنا كمان روحي فيه من يوم أمه ما ماتت.. بقيت كل أهله.. وهو كل دُنيتي..
حورية: كنت بتحب أمه زي ما بتحبه كده؟
سيد: حُب إيه؟! الله لا يسيئك.. إحنا لينا فيه ولا نقدر عليه؟!
حورية: يعني اتجوزتها كده أورديحي؟!
سيد: كات سانداني.. بتتحامى فيَّ م الدنيا..
حورية: برضه القلب وما يريد.. هو ده اللي بيخلي الدنيا تِحلوّ في عينينا مهما كانت..