من فيلم ابن حميدو
حميدو: ريس من غير مركب زي مركب من غير ريس يا ريس!

من فيلم إسماعيل يس في البوليس
زكي: وموديهم فين إن شاء الله؟
رشدي: آ.. الجنينة.
أم جمالات: جنينة الحيوانات.
زكي: أكبر أذيَّة ليكي! حايحوشوكي هناك.
أم جمالات: لنا ربنا يقدرك وتشتري مراية، حاتعرف مين اللي حايحوشوه هناك.
رشدي: ماتتفضَّل معانا يا سي زكي، أهو تتفرَّج.
زكي: أتفرَّج على إيه يا راجل؟! ماهم كل يوم معايا هنا.

من فيلم ابن حميدو
الريس حنفي: معلش يا ابن حميدو.. بكره أصلحهالكم وأخليها بارجة نفاثة!
حميدو: يباركلنا في أنفاسك يا ريس حنفي!!

من فيلم إسماعيل يس في البوليس
عبد البديع: مالك؟ تعبان؟
زكي: ماشوفتش أبدًا جحش صغيَّر جارِر عربية كارُّو محمِّلة، وبينهج في مطلع؟
عبد البديع: لا، ما شوفتش.
زكي: (يشير لنفسه) اتفضل شوف.

من فيلم إسماعيل يس طرزان
نمر: آه! يعني طمعانين في أموالي مش في جمالي. هما البني آدمين كده؟! يا سلام! أنا لو كنت عارف أن أخلاقهم بالشكل ده، كنت فضلت في الغابة مع الوحوش يا وحوش.
أسيوية: إنت ناكر الجميل! إحنا حوِّلناك من حيوان إلى إنسان.
نمر: إنتوا عملتوا فيَّ مقلب! يا ريتني فضلت حيوان على طول، وماحدش يتحكِّم في عواطفي.
مراد: سيبك من الفلسفة الحيوانية دي.

من فيلم إسماعيل يس في البوليس
أم جمالات: (عن جمالات) ده أنا أجوِّزها لسيد سيدك!
زكي: اسمعي أمَّا أقول لك.. مافيش غير واحد بس، اللي اتجوِّز بنت لها أم زيك.
أم جمالات: هو مين ده؟
زكي: (يأخذ من الجردل ويشير إليه) داهو!