من فيلم النوم في العسل
وزير الداخلية: فيه جديد يا مجدي؟
مجدي: دايمًا فيه جديد يا سعادة الباشا.. بعد حديث السيد وزير الصحة في التليفزيون، الناس كلها واقفة قدام المرايات، تكلم نفسها.. يعني المسألة مابقيتش عجز جنسي وبس.. لأ، الناس اتجننت كمان.
وزير الداخلية: اللي ماعندوش مخ يا مجدي، ماعندوش إحساس بأي مشكلة!
مجدي: وإيه فايدة الناس وهما فاقدين المخ والخصوبة؟! ومين اللي عايزنا نكون من غير مخ ولا خصوبة؟!
وزير الداخلية: إحنا مسئوليتنا الأمن، مش السياسة.
مجدي: سيادة الوزير، فيه جهات تانية داخلة في الموضوع ده! لازم نعرف مين اللي خايف يواجه الحقيقة، وبيحارب عشان ماتظهرش..
وزير الداخلية: مجدي.. المباحث مابقتش تخصك. اختار المكان اللي تحب تروحه.
مجدي: سيادة الوزير، ليه دايمًا حرية الاختيار بتبقى في الأذية بس؟! يعني: "تتضرب ولّا تتجلد؟ تتنشنق ولّا تتدبح؟ تستقيل ولّا تتطرد؟".
وزير الداخلية: ماحدش قاللك استقيل، ولا حد عايز يطردك! أنا باقولك اختار المكان اللي تحب تروحه!
مجدي: بيتنا! أنا اخترت بيتنا. أنا عندي ولد وبنت لازم أحوَّط عليهم، وأخلي بالي منهم.. عايز أتطمِّن على بكرة بتاعهم.

من فيلم حنفي الأبهة
سيدة الحفل: فيه إيه يا حنفي بك أكتر من أن طبقة الأوزون تتخرِم؟! دي مسألة في منتهى الخطورة.
حنفي الأبهة: الأوزون اتخرم؟ مانتي الحق عليكي! إزاي تسبيبهم يخرموه؟! ابقي اقفلي الشبابيك وانتي خارجة، هاه؟ مين اللي خرمه؟ البلد دلوقتي بقيت أي حاجة فيها تتخرم بسهولة.

من فيلم اللعب مع الكبار
حسن: علي مات! علي الزهَّار مات! مات عشان بيحلم!

من فيلم النوم في العسل
مجدي: هو يوم منيل بستين نيلة!

من فيلم حنفي الأبهة
اللواء عبد الخالق أبو العينين: يا ابني كفاية بقى!
حنفي الأبهة: أصلها دبانة رزلة أوي!
اللواء عبد الخالق أبو العينين: يا ابني اهمد، اهمد شوية! قولنا خلاص! خلاص يا ابني! خلاص اعمل معروف سيبها في حالها، ارحمها وارحمها وارحمنا!

من فيلم زهايمر
محمود: وإيه الصورة دي بقى؟
منى: دي لما خدت بطولة الجمهورية.
محمود: في إيه؟
منى: في الملاكمة.
محمود: في الملاكمة، آه! وأنا غلبت ده؟!
منى: بالقاضية.
محمود: وهو عارف أن أنا غلبته؟!