من فيلم ضد الحكومة..!
مصطفى: أنا من صغري ماباحبش حاجتين: الحُما والحلاقة.

من فيلم إسكندرية.. ليه؟
إبراهيم: لما أنت عارف أنك حاتخسرها.. جاي ليه؟!
قدري: تنفيسة! تنفيسة ليَّ ولك. كلمة حلوة نقولها، صحافي يلقط مننا لمحة نضيفة، قاضي تفلِت منه كلمة شجاعة.. أهي تنفيسة للكل. زمن! زمن يبرَّروا فيه أنهم يرموا البومب على دماغ ناس مالهومش دعوة الحرب خالص، وعايزني أكسبها؟! زمن بتتشوي فيه الناس في الأفران عشان لون جلدها أحمر ولّا أسمر ولّا عينيها مسبسبة، وعايزني أكسبها؟! زمن بيلمّوا فيه ولاد الناس -سن 16 و17- ويوقدوهم تحت الرمل باسم الحُريَّات الأربعة، وعايزني أكسبها؟! زمن بيكسِّبوا فيه فرد واحد 5000 جنيه في دقيقة، ويغلُّوا على التاني أجرة الترماي، وعايزني أكسبها؟!

من فيلم ضد الحكومة..!
فاطمة: قريت المُرافعة بتاعتك في الجرنال.
مصطفى: عجبتك؟
فاطمة: مفيش أسهل من الكلام. لو كان الكلام بفلوس، كُنا بقينا أغنى دولة في العالم.

من فيلم امرأة واحدة لا تكفي
حسام: أبقى ابن 60 كلب لو أنكرت فضلك علي يا أميرة هانم.. بس مش عيب تِعايري الراجل اللي اخترتيه يبقى جوزك؟!

من فيلم ضد الحكومة..!
زكي: أنا بس كنت عايز أعرف حاجة مهمة أوي: أنت حقيقي، ناوي تقف قدام الحكومة؟
مصطفى: أنا ناوي أعمل الصح، وأصمم عليه مرة في حياتي.
زكي: إحنا لو عملنا الصح، مش حانلاقي ناكل يا ريِّس.

من فيلم امرأة واحدة لا تكفي
حسام: عمر ما كانت تربية الدقن إثبات على إن الإنسان صالح ومتدين.

من فيلم ضد الحكومة..!
مصطفى: اسمعوا يا جماعة: النهاردة حانحتفل بعيد ميلاد سامية للمرة الخامسة السنة دي.

من فيلم الإمبراطور
زينهم: طول ما أنا باكدب بتسمعوني، ولما أقول الحقيقة بتزعلوا.

من فيلم شفيقة ومتولي
متولي: بني آدم يا جناب الحكيم.. بني آدم مالوش قيمة؟!
الحكيم: لأ، لُه قيمة. بس لازم هو اللي يدافع عنها.. غير كده..
التمرجي: ينشرا ويتباع ويتعمل فيه أي حاجة.

من فيلم الإمبراطور
زينهم: لا يا باشا دي أرزاق.. لازم حد يتسجن، عشان حد يسجنه، وحد يضربه، وحد يحقق معاه، والكل ياكل عيش وكلها تمشي.