فيلم إسماعيل يس طرزان

Ismail Yassine Tarzan

حسنات: أنت مش عايز تحبني ليه؟!
نمر: مالياش نِفس.

حسنات: دول اللي قبلنا قالوا: "إن حبتك حية اتطوَّق بيها".
نمر: أيوة، بس حية عن حية تفترق.. ده أنتي لدعِتِك والقبر!

حسنات: أنت قاسي، جبار.. إن العذراى قلوبهنَّ هواءُ.

مراد: ماتختشيش على عرضك؟! بتضحك على عيلة زي دي؟!
نمر: بقى بذمتك دي عيلة؟! دي بابا نويل!

حسنات: آه! اتهزأت يا پاپّا.. أنا ماقدرش أعيش بعد كده يا بابا.. أنا حانتحر، أنا حاشرب فليت.

نمر: يا سلام يا شيتا.. أنا النهاردة بس عرفت إيه سبب تعاسة الإنسان وسعادة الحيوان.. قولتيلي إيه؟ مظبوط.. الفلوس.. الفلوس هي اللي بتعمل الفوارِق الاجتماعية بين الناس.. الفلوس هي اللي بتخلي الناس تتحشر في كل شيء حتى الجواز، ولو إن الجواز ده من اختصاص العريس والعروسة بس.. الفلوس هي اللي بتعلِّم الناس قِلة الأصل. قولتيلي ليه؟ أقولك ليه، ولو إنك لا قولتيلي ليه ولا حاجة.. مثلًا بيقولوا كل واحد يعمل بأصله.. ولو إن البني آدم مابيعملش بأصله أبدًا لأن أصله قرد، هما بيقولوا كده. أهو مثلًا عندنا في الغابة، الحمار لو حَب حمارة، مايجيش أبو الحمارة يدبحها ويشرب من دمها.. الثور مثلًا لو حب ثورة، مايجيش مثلًا في يوم من الأيام يفتح شنطتها ويشوف صورة ثور تالت، ليه؟ لأن فيه أمانة.. فيه شرف.. فيه إخلاص.. علشان كده أنا لازم أخلَّص صافي من الجو الإنساني اللي هي عايشة فيه.

نمر: آه! يعني طمعانين في أموالي مش في جمالي. هما البني آدمين كده؟! يا سلام! أنا لو كنت عارف أن أخلاقهم بالشكل ده، كنت فضلت في الغابة مع الوحوش يا وحوش.
أسيوية: إنت ناكر الجميل! إحنا حوِّلناك من حيوان إلى إنسان.
نمر: إنتوا عملتوا فيَّ مقلب! يا ريتني فضلت حيوان على طول، وماحدش يتحكِّم في عواطفي.
مراد: سيبك من الفلسفة الحيوانية دي.