فيلم إسماعيل يس في البوليس

Ismail Yassine Fel-Police

زكي: (مُحَدِّثًا ملابس جمالات) صباح الخير يا جميل.. صباح الحب يا حلو. كل سنة وإنتي طيبة يا جمالات.. أهلًا أهلًا أهلًا.. يا رب السنة الجاية نكون متجوزين بعض، وأكون أنا اترقيت بقيت باش شاويش بأربع شرايط، وساعتها يوم الوقفة زي النهاردة ناخد قُرَص ونطلع ع القرافة، ونفرا الفاتحة على روح حماتي. (تتسحَّب أم جمالات من وراء القماش وتسمع الحوار) الفاتحية.. بسم الله.. زمانها دلوقتي في الآخرة عاملة زيطة وزمباليطة، والأسبرين هناك للرُّكَب.. داهية تجحِمها مطرح ما راحت! ولية سافلة قليلة الأدب لِسانها بينقَّط سم..

زكي: الفاتحة كمان مرة على روحك يا حماتي.
أم جمالات: الفاتحة عليك وعلى اللي خلِّفوك وسابوك على دي الأرض يا وبا يا عيا!

زكي: يا سلام على ذوقك الحلو.. يا سلام على كلامك اللي بينقَّط سكر.. كل سنة وإنتي طيِّبة يا حماتي..
أم جمالات: لأ!
زكي: بلاش.. سنتِك.. سودا يا حماتي.

أم جمالات: بطَّل الدوشة دي يا مقصوف الرقبة وقول يا صبح.
زكي: يا صُبح.

عبد البديع: مالك؟ تعبان؟
زكي: ماشوفتش أبدًا جحش صغيَّر جارِر عربية كارُّو محمِّلة، وبينهج في مطلع؟
عبد البديع: لا، ما شوفتش.
زكي: (يشير لنفسه) اتفضل شوف.

زكي: وموديهم فين إن شاء الله؟
رشدي: آ.. الجنينة.
أم جمالات: جنينة الحيوانات.
زكي: أكبر أذيَّة ليكي! حايحوشوكي هناك.
أم جمالات: لنا ربنا يقدرك وتشتري مراية، حاتعرف مين اللي حايحوشوه هناك.
رشدي: ماتتفضَّل معانا يا سي زكي، أهو تتفرَّج.
زكي: أتفرَّج على إيه يا راجل؟! ماهم كل يوم معايا هنا.