فيلم آثار في الرمال

Aathar Fel Remal

راجية: رسمت صورتك.
إبراهيم: صحيح؟
راجية: أيوة.
إبراهيم: ورسمتيني من الذاكرة؟
راجية: طبعًا م الذاكرة، ماتعرفش أنك مُقيم فيها؟

راجية: .. كمان كنت أنبسط لما أشاركهم فيك، زي ما باشركهم في الشمس والهوا، لكن دلوقتي باحس أن الشمس دي بتوَّرلي أنا لوحدي.
إبراهيم: الشمس هي اللي بتستمِد نورها منك، ومن مشاعرك.. الضوء اللي إنتي شايفاه، ده نور قلبك معكوس عليها.

راجية: أنا خايفة.
إبراهيم: خايفة من إيه؟
راجية: خايفة م المستقبل، وم الأيام..
إبراهيم: ليه بس يا راجية؟!
راجية: خايفة م المستقبل لأنه بعيد ومجهول.. وخايفة لأيَّامنا الحلوة دي تخلص.
إبراهيم: بالعكس.. دي أيَّامنا الحلوة لسة حاتبتدي.

مشكال لسنية: حبيبةُ القلبِ والمُصرانِ والكَبِدِ.

إبراهيم: (عن قصيدة شعر "ظبية البان" للشريف الرضي) "هَبَّت لَنا مِن رِياحِ الغَورِ رائِحَةٌ، بَعدَ الرُقادِ عَرَفناها بِرَيّاكِ".

إبراهيم: شايفة كل دول؟ أنا قريت نصهم في الفترة اللي قضيتها هنا.
راجية: وإزاي بتقدر تلاقي الوقت؟
إبراهيم: أنا عندي غير التلحين والقراية؟ القراية تخلي الواحد بني آدم.
راجية: عندك حق، أنا كمان عندي مكتبة كويسة أوي..

راجية: (عن جهاز تسجيل) الحقيقة جهاز مهم أوي! الواحد يقدر يسجل عليه كل الألحان للي بتعجبه عشان يقدر يسمعها تاني!

مشكال: أنت فاكر يا أستاذأن مفيش غير فن الرسم والموسيقى بس؟! ده فن الطبخ، أهم من كل الفنون.
عبد الرحمن: يا سلام؟ ليه بقى؟!
مشكال: ليه بقى؟! أنت ماتعرفش أن الأكل الموزون ينوَّر الأفكار؟

إبراهيم: راجية، بصيلي..
راجية: مش عايزة أفتَّح عينيَّ.. متهيَّألي إن باحلم، وخايفة أصحى لا يروح الحلم الجميل اللي أنا فيه.
إبراهيم: الحلم الجميل اللي أنتي فيه حايفضل على طول، مش حاينتهي أبدًا.. راجية، قولي إنك بتحبيني..
راجية: لأ مش حاقول! لأن اللي عندي ده مش حب، أكتر من حب.. الواحد لما يحب حاجة، تكون غريبة عنه.. لكن أنت في دمي.. في كياني.. فهِمت أنت إيه بالنسبة لي؟
إبراهيم: أنا كمان حاسس إني ماقدرش أستغنى عنك.. حاسس أن حياتي مُستمدة منك.. من غيرك ماقدرش أعيش أبدًا..

د. أحمد زكي: (عن الطاحونة) طبعًا دي مابتشتغلش دلوقتي.
حارس الطاحونة: لا! التروس والمراوح اتكسرت زي ما أنت شايف.. اللي دوِّبنا دوِّبها.. الزمن مابيرحمش.. كل حاجة تاخد زمنها.. على العموم، هي عملت اللي عليها، ياما وكِّلِت ناس..
الدكتور توفيق محمد: وأنت دايمًا قاعد فيها؟
حارس الطاحونة: حاروح فين؟!
د. أحمد زكي: مابتخرجش تشوف الدنيا يا حاج؟
حارس الطاحونة: دنيا؟! أشوف فيها إيه؟! أهي عجلة دايرة زي المروحة.. واحد بيدوَّرها ريح الزمن، والتانية بيدوَّرها ريح البحر. واحدة بتطحن بنى آدمين، والتانية بتطحن قمح. وفي الآخر، ده يبقى تراب، وده يبقى دقيق.. والعجلة دايرة زي ما هي، لا هي حاسَّة بده ولا بده! واللي بيروح بيجي غيره.