زينب: ماهو عنده حق! أصلها حاجة زي الفاتورة: عشان تنجح لازم تذاكر، وعشان تذاكر لازم كتب، وعشان كتب لازم فلوس.
حلمي: الفلوس متلتلة! إذا كان كتاب شرح الميثاق باتنين جنيه، والميثاق نفسه بقرشين! يعني اللي عايز يفهم الاشتراكية لازم يكون أبوه إقطاعي.

دياب: يا سلام يا جدعان.. خدوا الحكمة من أفواه النساوين.

طالب 1: كل ده قماش؟ كل دي يُفَط؟
زينب: والكلام ده مين اللي حايقراه بس في "ميت معقول"؟
إسماعيل: الفلاحين طبعًا.
زينب: مش لما نعلمهم القراية الأول؟!
طالبة 1: طول ما هما عيانين، ومش واكلين، ومش لابسين، عمرهم ما حايتعلِّموا.
إسماعيل: على فكرة، اليُفَط دي حاتعمل أزمة قماش في البلد.
زينب: إيه رأيكم، بدل ما نكتب ع القماش ده، نفصَّلهُ جلاليب للفلاحين.

مسئول منظمة الشباب بالكلية: مالكومش دعوة أنتوا بالمسائل دي!
زينب: مالناش دعوة إزاي؟! إحنا كل المجهود اللي بنقوم بيه ده، على أساس أن لينا دعوة!
طالب 2: والرأي ده، من منطلق الحرص على المصلحة العامة.
مسئول منظمة الشباب بالكلية: خليكوا في شغلكوا أحسن، إحنا عارفين بنعمل إيه كويس! أنت، وإنتي، حصَّلوني ع المكتب.

محمد بهجت: حد يصدَّق، أن كيلو الرز بقى بخمسة صاغ؟!

إمام: صدق اللي قال، مصر خيرها لغيرها!