صوت من خارج الكادر:" الدنيا واللي في الدنيا.. هنا كله في صندوق الدنيا.. مِد يا شاطر.. قبل ما يلعب... قرب وإتفرج على الدنيا.. أول هام: الدنيا الحلوة اللى اسم الله عليك عارفها وشايفها من حواليك.. لا جات بالساهل ولا جات بالمال.. تانى هام: فيه ناس تعبت وناس غلبت.. وتالت هام: ناس هبشت في الدنيا وطلعت. وناس يا حَول الله وِقعت من قَعر الدنيا.. ورابع هام: أقعد وإتفرج على الدنيا...

علوان: أنا مش باحسدك. ربنا يغنينا بالحلال. الله يرحمك يا خال عطية، كان دايمًا بيقول: "اللى يتلفَّح بالحرام يعيش عريان ويموت عريان".

فهيمة: ريَحى نفسك يا ضنى قلبى. لا سحر ينفع، ولا شَبْشَبَة تشفع!

العطار: دى بِت ولاَّدة؛ جابت إتنين في بطن.
عتمان: عجيبة يا دنيا.. اللى مامعهوش قرش، يجيله كل سنه كِرش..!

عتمان: إيه ده؟!
حفيظة: إيه ده؟!
عتمان: وزة... وزة يا وليه؟! إنتى اتهبلتي؟!
حفيظة: والله ما اتهبل إلا أنت.. كنت قُلت لك نفسي في البط؟!
عتمان: وأنا كنت قُلت لك نفسي في الوز؟!
حفيظة: آه.
عتمان: وزة وبطة! اللهم إنى لا أسألك رد القضاء.. النهاية. عليه العوض ومِنه العوض. حَوِّشي الكبدة، وحَمَّرى الدَّكر لوحده.
خفير: يحمض يا عمدة.
عتمان: حمضت معدتك.. اسمع يا وله، بعد ما يتحمَّر الدكر تاخده توديه لحضرة ظابط النقطة وتقول له حضرة العمدة دابحهولك خصوصي.. فاهم؟ خصوصي.

أبو العلا: وإيه ده كله. بطة ووزة! دى ماحصلتش!
فاطمة: من بختي لاجل ما ادوق الوِز وأستطعم طعمه.
أبو العلا: يعنى هايكون طعمه آيه؟! أهو وز.
فاطمة: يعنى أنت دُقته؟!
أبو العلا: أيوه. وأنا صغير أمى كانت عندها وزة لحقتها بالسكينة وهى بتفرفر. شايفة الفخدة دى يا بِت؟ يوزن لها بالقليل كده يجي رطلين لحمة.
فاطمة: ولَّا الطبلة دي.. الطبلة اللى عاملة زى اللية.
فاطمة: آه ياني لو الوزة دي بتاعتنا.
أبو العلا: يا سلام يا بِت.. دى كانت تبقى ليلة.
فاطمة: دا أنا كنت أسلقها وأشويها وأفصصها فصوص، وأعملك صحن فتة. وكُل يا أبو العلا..
أبو العلا: لأ كُلي إنتي.
فاطمة: والنبي ماتكسفش إيدي. كُلْ إنت.
أبو العلا: بس إن ماكنتيش تحلفي.. أقولك.. إنتي النُص وآني النُص.